Bjarný og Kristinn með barnabarnið Guðna Grímsson.

Í tilefni af 100 ára afmæli Björgunarfélags Vestmannaeyja, 4. águst 2018,  gáfu hjónin Eygló Kristinsdóttir og Grímur Guðnason félaginu mjög rausnarlega gjöf. Gjöfin er gefin til að heiðra minningu foreldra og tengdaforeldra Eyglóar og Gríms þau Guðrúnu Bjarnýju Guðjónsdóttur og Kristins Sigurðssonar.

Guðrún Bjarný, alltaf kölluð Bjarný, var fædd 17. mars 1921 og lést 8 júlí 2003.

Kristinn, betur þekktur sem Kiddi á Skjaldbreið, var fæddur 2. september 1917 og var bráðkvaddur 26. júní 1984.

Kiddi á Skjaldbreið, Slökkvistjóri Slökkviliðs Vestmannaeyja

Kiddi á Skjaldbreið vann hin ýmsu störf fyrir Björgunarfélag Vestmannaeyja á sinni lífsleið, meðal annars var hann formaður Björgunarsveitar Björgunarfélags Vestmannaeyja. Áhugi Kristins á björgunarmálum var mikill og varði hann miklum tíma í að efla félagið og búa það sem bestum tækjum. Kristinn hét því þegar hann var hætt kominn í sjóferð að ef hann kæmist heill að landi skyldi hann vinna af alhug að bættum björgunar- og slysavörnum og hélt hann því loforði allt til dauðadags.

Eins og Eygló sagði frá í ræðu sinni þá var það ætíð þannig á heimili þeirra hjóna að þegar útkall kom þá var brugðist fumlaust við og allir höfðu skildum að gegna. En á heimilinu voru 2 símar, heimilissíminn og svo „hinn“ síminn eða neyðarsíminn. Það má því segja að lífið á heimilinu hafi líka snúist í kringum Björgunarfélagið og starfsemi þess. Einnig var Bjarný virk félagskona í slyslavarnafélaginu Eykyndli.

Eygló og Grímur með barnabörnin Grím Goða, Hólmfríði Eldey, Kára og Eddu Björk.

Kristinn var  heiðursfélagi í Slysavarnarfélagi Ísland ásamt því að vera heiðraður af Belgíska ríkinu, fyrir björgunarstörf í tengslum við  togarann Pelagus. Einnig bar bátur félagsins nafn Kristins.

Í dag eru fjórir af fjölskyldu Kristins og Bjarnýjar virkir félagar í Björgunarfélagi Vestmannaeyja. Tengdasonurinn Grímur starfar með félaginu og sat á árum áður í stjórn þess. Guðni Grímsson barnabarn Kristins og Bjarnýjar og sonur Eyglóar hefur verið viðloðinn félagið allt sitt líf og hefur starfað ötullega með félaginu frá 16 ára aldri og er núna formaður björgunarbátasjóðs félagsins.  Einnig starfa barnabarnabörn Kristins og Bjarnýjar, þeir Davíð Smári og Björgvin Hlynssynir með félaginu.

Gjafabréfið góða

Það er því ánægjulegt á 100 ára afmæli Björgunarfélags Vestmannaeyja að geta fylgt hugsjón Kidda á Skjaldbreið og bætt búnaðinn hjá félaginu. Og því gefur fjölskylda Eyglóar Kristinsdóttur og Gríms Guðnasonar félaginu 800.000 kr til búnaðarkaupa.

Með þessari gjöf vill fjölskyldan halda uppi heiðri hjónanna Kidda á Skjaldbreið og Bjarnýjar.

Eygló og Grímur ásamt börnum og mökum. Kristín, Guðni, Grímur, Eygló, Númi og Kristín

SKL jól