Sjómannafélag Eyjafjarðar og Sjómannafélagið Jötunn hafa dregið sig út úr samningaviðræðum við Sjómannafélag Íslands, Sjómanna- og vélstjórafélag Grindavíkur og Sjómannafélag Hafnarfjarðar. Viðræðurnar höfðu verið í gangi um nokkurt skeið. Þessu greindi mbl.is frá.
Þessi fimm af stærstu sjómannafélög landsins voru í viðræðum um sameiningu í eitt stórt stéttarfélag sjómanna. Fram kemur á Facebook-síðu Sjómannafélags Eyjafjarðar að óhjákvæmilegt hafi verið að bregðast við þeim ásökunum sem hafa verið settar fram á hendur stjórnenda Sjómannafélags Íslands.
„Í fréttum undanfarna daga hafa komið fram mjög alvarlegar ásakanir á hendur stjórnendum Sjómannafélags Íslands um óheiðarlega framkomu og falsanir á fundargerðarbók sjómannafélagsins. Ásakanir þessar hafa komið fram í tengslum við fyrirhugað mótframboð til stjórnar félagsins í tengslum við aðalfund þess sem fram fer á milli jóla og nýárs. Þessar ásakanir telja stjórnendur ofangreindra félaga svo alvarlegar að við því verði að bregðast,“ segir í yfirlýsingu félaganna á Facebook.
Fram kemur að mat stjórnenda félaganna sé að ekki verði farið lengra og því hafi verið ákveðið að draga sig út úr samningaviðræðunum.