ÍBV mætti Haukum í Hafnafirði í leik í 10. umferð Olís-deildar karla í gær.

Eyjamenn byrjuðu ágætlega og komust í 1-3 en þá tóku Haukar við sér og snéru leiknum við og eftir tíu mínutna leik var staðan orðin 7-3 Haukum í vil. Eyjamenn tóku þá aðeins við sér eftir að hafa verið undir 11-7 og jöfnuðu leikin 13-13 með þrjár mínútur eftir að fyrri hálfleik. Það dugði þó skammt og var staðan í hálfleik 16-14.

Í síðari hálfleik sáu Eyjamenn aldrei til sólar og markvörður hauka Grétar Ari Guðjónsson hreinlega lokaði markinu. Þrátt fyrir að fá nóg af færum voru þau illa nýtt því fór sem fór. Til að mynda skorar ÍBV aðeins úr tveimur vítaskotum af sjö í leiknum. Lokatölur 32-26 Haukum í vil.

Markahæstur í liði ÍBV var Kristján Örn Kristjánsson með sex mörk. Aðrir markaskorarar voru Fannar Þór Friðgeirsson (5), Dagur Arnarsson (4 / 2), Theodór Sigurbjörnsson (3), Hákon Daði Styrmisson (2), Kári Kristján Kristjánsson (2), Elliði Snær Viðarsson (1), Daníel Örn Griffin (1), Róbert Sigurðarson (1) og Sigurbergur Sveinsson (1).

Eftir leikin eru Eyjamenn áfram í 10. sæti með 6 stig, jafnir Gróttu sem á þó leik til góða og mætir Selfossi á morgun. Með sigri þar kemst Grótta upp fyrir meistarana sem detta þá niður í fallsæti.