Þekkingarsetur Vestmannaeyja stendur fyrir mánaðarlegri fundarröð um sjávarútveg þar sem rúmlega 100 aðilum sem tengjast sjávarútvegi í Eyjum er boðin þátttaka. Á þriðjudaginn hélt Þorsteinn Sigurðsson, sviðstjóri uppsjávarlífríkis hjá Hafrannsóknarstofnun erindi sem bar yfirskriftina: Hvað er að frétta af loðnunni? Um 60 manns komu á erindið frá hinum ýmsu sviðum sjávarútgsins.
Þær umhverfisbreytingar sem orðið hafa á undanförnum áratugum hafa leitt til mikilla breytinga í útbreiðslu fiskistofna og er loðnan engin undantekning þar á. Í erindinu er þessum breytingum lýst og farið yfir það hvaða áhrif breytingarnar hafa haft á útbreiðslu loðnunnar. Farið er yfir stöðu þekkingar og hvernig reynt hefur verið að bregðast við þeim með aukinni vöktun og nýjum rannsóknum. Jafnframt er farið yfir stöðu nýjustu mælinga á loðnustofninum og spáð í horfurnar.
Eins og staðan er núna er ekki hægt að gefa út kvóta og ákveðið var að halda leitinni að loðnunni áfram. Polar Amaroq fór af stað í leit á þriðjudaginn og gert er ráð fyrir að hafrannsóknaskipið Árni Friðriksson haldi síðan til leitar á föstudaginn. „Byrjað verður á að skoða útjaðra leitarsvæðisins en megintilgangurinn er að kanna hvort eitthvað hefur bæst í þau rúmlega tvö hundruð þúsund tonn sem mældust á dögunum. Það er ekki búið að ákveða hve lengi þessi skip verða við leit núna en það mun meðal annars fara eftir því hvort eitthvað hefur breyst frá fyrri leit,“ sagði Þorsteinn
Hægt er að horfa á erindið hérna.
