Ester Óskarsdóttir leikmaður ÍBV í handbolta var útnefnd Íþróttamaður Vestmannaeyja 2018 og Sigurður Arnar Magnússon, knattspyrnumaður Íþróttamaður æskunnar 2018.
Þetta var tilkynnt á fjölmennri uppskeruhátíð Íþróttabandalags Vestmannaeyja í Akóges í gærkvöldi þar sem leikmenn og velunnarar félagsins voru samankomnir. Tilkynnt var um íþróttamann hvers aðildarfélags og Heiðursmerki afhent.
Fimleikafélagið Rán tilnefndi Sigrúnu Gígju Sigurjónsdóttur sem fimleikamann ársins. Golfari ársins var valinn Daníel Ingi Sigurjónsson.
Hjá ÍBV-íþróttafélagi voru það Ester Óskarsdóttir og Sigurbergur Sveinsson sem voru tilnefnd hjá handboltanum en Cloé Lacasse og David Atkinsson hjá fótboltanum.
KFS tilnefni þá Egil Jóhannsson sem knattspyrnumann ársins í sínum röðum. Íþróttafélagið Ægir valdi Anton Sigurðsson, Karatefélag Vestmannaeyja valdi Hermann Inga Ágústsson, Sundfélagið Súsönnu Sig Sigfúsdóttur og Tennis- og badmintonfélagið Eyþór Harðarson. Blakfélag ÍBV, Körfuknattleiksfélag ÍBV og Ungmennafélagið Óðinn tilnefndu engann úr sínum röðum að þessu sinni.
Þá var Arnari Péturssyni sem gerði ÍBV að þreföldum meisturum í meistaraflokki karla í handbolta á síðasta ári, veitt sérstök heiðursverðlaun.
Meistaraflokkur karla í handbolta fengu sérstaka viðurkenningu fyrir frábæran árangur og var þeim afhent Starfsmerki ÍBV.
