Á bæjarráðsfundi í byrjun janúar kom fram að fundarmenn hefðu verið sammála um að stjórnun ferðamála Vestmannaeyjabæjar væri best borgið í höndum hagsmunaaðila í ferðaþjónustu í Vestmannaeyjum. Jafnframt kom fram tillaga um að fulltrúar ferðaþjónustunnar taki að sér umsjón ferða- og markaðsmála á vegum bæjarins. Berglind Sigmarsdóttir formaður ferðamálasamtakan sagði í samtali við Eyjafréttir að þetta væri jákvæð þróun.

„Við teljum þetta vera mjög jákvæða þróun, ég held að flestir geri sér grein fyrir mikilvægi ferðaþjónustunnar fyrir bæinn og það hefur vantað aðstoð til þess að koma okkur aðeins á kortið. Það fer mikil umferð af ferðamönnum meðfram suðurlandinu sem við höfum ekki náð að klukka, það eru uppi ýmsar hugmyndir hjá Ferðamálasamtökunum um hvað má gera betur og við teljum að það sé best að hagsmunaaðilar muni drífa það áfram, það er mikið í húfi og þarf að byrja á einhverju sem allra fyrst,“ sagði Berglind.

Berglind, fremst á myndinni á Mannamótum 2019 sem haldin var 17. janúar sl. Mannamót er árleg ferðasýning/kaupstefna sem haldinn er af Markaðsstofum landshlutanna.

Peningunum betur varið
Berglind sagði að með þessu yrði umsvifin hjá samtökunum talsvert meiri. „.Þetta þýðir meiri vinna hjá okkur en það er það sem þarf, við vitum hvað þarf að gera en við munum ráða líklega verkefnastjóra í ákveðin verkefni sem þarf að gera. Þannig teljum við að þetta verði mun markvissara en áður og peningunum betur varið.

Gott samstarf við framkvæmdastjóra Herjólfs
Berglind sagði að samtökin væru búin að vera í góðu sambandi við Guðbjart Ellertsson nýjan framkvæmdastjóra Herjólfs, „við höfum verið að koma með tillögur til hans er varðar þjónustu skipsins og gefa honum upplýsingar sem við teljum að þurfi að gera vel til þess að auðvelda ferðamönnum aðgang að skipinu. Það hefur verið smá gjá á milli ferðamannsins og skipsins, það hefur verið lokað fyrir bókanir og það hefur verið erfitt fyrir ferðamanninn að átta sig á hvernig hann kemst í Landeyjahöfn eða Þorlákshöfn og allt sem tengist skipinu, rútuferðum og fleira. Það er mjög mikilvægt að þetta sé allt mjög skýrt í nýju bókunarkerfi og nýrri heimasíðu. Að allar upplýsingar séu á hreinu og auðvitað á að minnsta kosti ensku og íslensku. Guðbjartur hefur tekið okkur vel, og nú hefur verið opnað fyrir bókanir mun fyrr en áður og það hrúgast inn bókanir til Eyja.“

Hlið uppá veg
Ferðamálasamtökin hafa verið að forgangsraða verkefnum og vilja fá hlið upp á gatnamótin við Landeyjarhafnarveg sem fyrst. „Við erum að skipuleggja hvaða verkefni er mikilvægast að fara í sem fyrst, það þarf að ákveða hvað verður með Tourist info sem hefur verið í Eymundsson í nokkurn tíma. Við viljum merkingu uppá veg sem allra fyrst og hafa það hliðið að Vestmannnaeyjum. Það á að sína hversu margar mínútur er í næstu ferð og aðrar upplýsingar sem nýtast ferðamanninum. Síðar vonum við að þarna verði þjónustumiðstöð þar sem við getum byrjað að bjóða fólki velkomið til Eyja, upplýst ferðamanninn, selt aðgang í skipið og margt fleira.

Frá Mannamótum 2019 sem haldin var 17. janúar sl. Mannamót er árleg ferðasýning/kaupstefna sem haldinn er af Markaðsstofum landshlutanna.

Erfitt að vita af þúsundum ferðamanna hinu meginvið sjóinn
Aðspurð sagði Berglind að sumarið leggist vel í ferðaþjónustuaðila. „Það er spenningur fyrir nýja skipinu, við erum að vonast til þess að skipið lengi ferðaþjónustutímabilið í báða enda, það væri gríðarlega mikilvægt fyrir okkur. Eins og ég hef sagt áður er erfitt að reka fyrirtæki sem þarf að búa við svona miklar sveiflur í rekstri. Það er erfitt að vita af þúsundum ferðamanna hér hinu megin við sjóinn sem koma ekki til okkar því það er nóg af ferðamönnum yfir veturinn á Íslandi en á meðan við er bara að fara í Þorlákshöfn kemur enginn. Þetta finna allir bæjarbúar, þegar ferðaþjónustu fyrirtækin verða að stytta opnunartíma til að koma í veg fyrir meira tap yfir þessa „lokuðu“ mánuði. Eins er að koma nýtt hvalasafn sem verður enn ein perlan í fjölbreytt úrval af afþreyingu í Eyjum. Við finnum mikinn áhuga fyrir því, þannig við teljum að það sé bjart framundan enda Eyjarnar náttúruperla með mikið að bjóða. Fólk áttar sig oft ekki á því fyrr en það er komið og hefði viljað vera lengur til þess að ná öllu. Eins er áhugi fyrir því að skoða flugsamgöngur betur, hvað það er sem hægt er að gera í því. Flug til Eyja er í algjöru lágmarki og eins og nýjustu fréttir herma með Erni að það verði jafnvel enn minna er alls ekki gott, þetta þarf að athuga vel,“ sagði Berglind.

Það er mikilvægt að vera sýnilegur
Markaðsstofur landshlutanna, í samstarfi við flugfélagið Erni og Isavia, halda árlega ferðasýningu/kaupstefnu á höfuðborgarsvæðinu, þar sem landsbyggðarfyrirtæki í ferðaþjónustu fá tækifæri til að kynna sína þjónustu og vöruframboð fyrir ferðaþjónustuaðilum sem staðsettir eru á höfuðborgarsvæðinu. Mörg ferðaþjónustufyrirtæki frá Vestmannaeyjum mættu þangað til að kynna sig og sín fyrirtæki. „Mannamót er fínn vettvangur til þess að láta vita af sér og ná spjalli við ferðaþjónustuaðila. Það er alltaf þannig að manni finnst eins og allir eigi bara að vita hvað allt er frábært hér en það er nauðsynlegt að mæta og kynna hvað við erum að gera. Margir hverjir vita ekki að við séum að fá fá nýtt skip sem á að ganga oftar í Landeyjahöfn, margir vita ekki af hvalasafninu sem er að koma, að það sé hægt að spila golf hér næstum því allt árið, margir vita ekki af fjölbreyttri flóru veitingastaða eða af brugghúsinu. Það er mikilvægt að vera sýnilegur og ná tali af þeim sem eru að selja ferðir til Eyja og líka bara að sjá hvað aðrir eru að gera. Lykilatriðið mun þó alltaf vera það að það sé einfalt og þæginlegt að komast til Eyja, allar samgöngur þurfa að vera þjónustumiðaðar og fólk þarf að vita af okkur. Það er kominn tími á þessar breytingar og við erum mjög spennt,“ sagði Berglind að endingu.

Húsasmiðjan – almenn auglýsing