Samningaviðræður í hnút

Á fundi Fjölskyldu- og tómstundaráð í vikunni fór fram Kynning á stöðu samningaviðræðna við ríkið um rammasamning hjúkrunarheimila.
Forsaga málsins er sú að árið 2016 var gerður rammasamningur milli Samtaka fyrirtækja í velferðarþjónustu (SFV), Sambands íslenskra sveitarfélaga og Sjúkratrygginga Íslands um rekstur hjúkrunar-, dvalar-, og dagdvalarrýma. Samhliða þessum samningi voru gerðar ýmsar kröfur til stofnanna og fylgdu framlög til stofnanna verðlagsþróun í samræmi við auknar kröfur. Nú er svo komið að rammasamningurinn rann út um síðustu áramót, greiðslur hafa ekki tekið neinum verðlagsbreytingum en hvergi hefur verið slakað á þeim kröfum sem lagðar eru á stofnanirnar sem um ræðir.
Bókun ráðsins er sem hér segir:
„Fjölskyldu- og tómstundaráð þakkar kynninguna. Ráðið harmar þann seinagang sem er í viðræðum Samtaka fyrirtækja í velferðarþjónustu (SFV), Sambands íslenskra sveitarfélaga og Sjúkratrygginga Íslands um nýjan samning um rekstur hjúkrunarheimila. Síðasti rammasamningur rann út um áramótin og enn hefur ekki tekist að semja. Ráðið tekur undir ályktun félagsfundar Samtaka fyrirtækja í velferðarþjónustu frá 12. ágúst sl. þar sem fram kemur mikilvægi þess að samningaviðræður við ríkið um þjónustu í hjúkrunar-, dvalar-, og dagdvalarýmum eigi sér stað miðlægt, milli samninganefnda SFV og ríkisins. Ráðið felur SFV áframhaldandi umboð Vestmannaeyjabæjar í þessari vinnu.“