Donni fer til Frakklands eftir tímabilið

Kristján Örn Kristjánsson eða Donni eins og hann er kallaður hefur samið við franska stórliðið PAUC frá Aix og fer til liðsins sumarið 2020. „Þetta er bolti sem fór af stað þegar við mættum þeim í Evrópukeppninni í Október í fyrra þeir hafa verið að fylgjast með honum og buðu honum út í janúar til að skoða aðstæður. Fljótlega í kjölfarið fóru af stað samningaviðræðu. Frakkarnir vildu fá hann strax í sumar en Donni ákvað að taka eitt tímabil í viðbót á Íslandi og klára samninginn við okkur,“ sagði Davíð Þór Óskarsson formaður handknattleiksdeildar ÍBV.
PAUC hefur verið að berjast í toppi frönsku deildarinnar undanfarin ár sem er fyrna sterk.
„Ég er mjög spenntur fyrir þessu liði þeir stefna hátt og það geri ég líka. Ég er mjög ánægður að ég ákvað að gera þetta svona og taka eitt tímabil í viðbót með ÍBV og nota tímann til að bæta mig“ sagði Donni í samtali við Eyjafréttir.
Það er óhætt að segja að Donni sé að byrja nýtt tímabil með látum hann skoraði 12 mörk úr 17 skotum og spilaði mjög góða vörn í fyrsta leik vetrarins gegn Stjörnunni. Það var mál manna að ástandið á leikmanninum væri með besta móti og augljóst að hann hefur æft vel í sumar.
„Þetta er búið að vera mikil hvatning fyrir mig að bæta mig, sérstaklega varnarlega. Ég er búinn að æfa mjög vel í sumar lyfta mikið og huga vel að matarræði með því. Ég finn líka að ég er miklu öruggari í öllum mínum aðgerðum,“ sagði Donni.
Ljóst er að Donni verður alger lykilmaður í liði ÍBV í vetur og óhætt að segja að hægri vængurinn hjá ÍBV er líklega sá allra sterkasti í deildinni, þar hefur Donni með sér þá Theodór Sigurbjörnsson og Gabríel Róbertsson.
„Við erum mjög ánægð að hann ákvað að taka þetta tímabil með okkur í vetur, eins erum við ánægð fyrir hönd Donna og stolt af þeim framförum sem hann er að taka með ÍBV“ sagði Davíð.
Donni kom til ÍBV sumarið 2018 hann skoraði 95 mörk í 22 leikjum í Olísdeildinni á síðasta tímabili en hann er uppalinn í Fjölni.