Foknar girðingar og brotnar flaggstangir tóku á móti þeim 200 áhorfendum sem mættu á Hásteinsvöll í dag að horfa á ÍBV taka á móti Breiðablik í PepsiMax deild karla. Fyrir leik mátti áætla að ekki yrði boðið upp á neitt sérstaklega skemmtilegan fótboltaleik, enda hífandi rok, kalt og grenjandi rigning.
Leikmenn beggja liða reyndu hvað þeir gátu til að halda boltanum niðri en það reyndist á köflum erfitt. Breiðablik komst yfir á 22. mínútu með marki frá Höskuldi Gunnlaugssyni en Gary Martin jafnaði úr vítaspyrnu 8 mínútum síðar. Urðu það lokatölur leiksins. Heilt yfir var jafnræði með liðunum en hvorugt liðanna náði að skapa sér hættuleg færi.Lokaumferðin verður leikin næsta laugardag og þá mætir ÍBV Stjörnunni í Garðabænum. Fyrir umferðina er Gary Martin næstmarkahæsti leikmaður mótsins.