Nú er komið að tólftu sýningunni í sýningarröðinni, Vestmannaeyjar í gegnum ljósopið mitt. Þau þrjú sem sýna að þessu sinni eru Katarzyna Żukow-Tapioles, Jói Listó og Svavar Steingrímsson.
Katarzyna, sem er frá Póllandi hefur búið hér síðan í mars sl. og verður gaman að sjá hennar sjónarhorn á Vestmannaeyjar og lífið hér. Hún kom hingað frá Spáni í leit að betra lífi og varð ekki fyrir vonbrigðum.
Jói, sem þekktur er fyrir listaverk sín sýnir á sér nýja hlið. Hann hefur ekki verið að flagga ljósmyndum sem hann hefur tekið en þær spanna áratugi. Svabbi kom mörgum á óvart í sumar þegar hann sló upp ljósmyndasýningu í Svölukoti á Goslokahátíðinni í sumar. Vakti hún mikla athygli enda áhrifamiklar myndir sem segja sögu mikilla átaka.
Sýning bræðranna Heiðars og Egils Egilssona á laugardaginn síðasta var bæði vel sótt og heppnaðist vel. Ekki er ástæða til annars en að margir leggi leið sína í Einarsstofu á laugardaginn því sýningarnar eru orðnar fastur liður hjá fólki sem finnst góð tilbreyting að sjá fallegar myndir, sýna sig og sjá aðra.
