Þann 25. janúar næstkomandi munu Eyjamenn nær og fjær sameinast í Hörpu og rifja upp Eyjalögin gömul sem ný. „Eyjalögin, bæði þau eldri og þau yngri, virðast ekki bara hljóma vel í eyrum Eyjamanna, því mörg af þeim eru orðin sígild dægurlög og mörg af nýju þjóðhátíðarlögunum hafa verið með vinsælustu lögum á hér á landi. Þar fyrir utan myndast mögnuð stemning á þessum kvöldum sem smitast út í söng og gleði og því má segja að þar ríki sannkölluð Þjóðhátíðarstemning. Já, við náum að flytja hluta töfranna úr Herjólfsdal í Hörpu. Fyrst og fremst er það gestum að þakka, sem koma í Hörpu, með sama hugarfar og í Herjólfsdal, að hitta ættingja og vini, hita upp með góðum sögum og flissi og hlátrasköllum, njóta svo tónlistar og enda svo kvöldið á að syngja saman og segja jafnvel enn fleiri sögur,“ sagði Bjarni Ólafur Guðmundsson, eða Daddi eins og flestir þekkja hann, sem staðið hefur fyrir tónleikunum frá upphafi.

Tónleikarnir eru ekki síður vettvangur til að rifja upp gömul kynni hvort sem er af Eyjamönnum eða Eyjalögunum.

„Allt hófst þetta með því að ákveðið var að minnast Oddgeirs Kristjánssonar þegar 100 ár voru liðin frá fæðingu hans. En Oddgeir var einn af dáðustu sonum Eyjanna og var kosinn Eyjamaður tuttugustu aldarinnar. Síðan þá hafa verið flutt lög og ljóð eftir ótal höfunda og fjöldi þeirra sem komið hafa að þessum kvöldum talinn í hundruðum,“ sagði Daddi.

Stórsöngvarar á tónleikunum á síðasta ári.

Tónleikarnir hafa þótt vel heppnaðir og margir sem sækja þá árlega. Í ár virðist ekki ætla verða nein undantekning enda valinn maður í hverju rúmi. „Tónleikarnir í ár hafa hlotið vinnuheitið „Í brekkunni.“ Fyrir rétt rúmum 30 árum kom ungur maður til Eyja á Þjóðhátíð, þá hluti af hljómsveit sem átti eftir að verða langvinsælasta hljómsveit landsins allt fram á þennan dag, Sálinni hans Jóns míns. Hann og hans félagar slógu í gegn á þessari hátíð og á henni var frumflutt Þjóðhátíðarlag eins og alltaf. Textann við þetta Þjóðhátíðarlag árið 1989 gerði Bjartmar Guðlaugsson, en lagið samdi þessi ungi maður, Jón Ólafsson, sem stuttu seinna sagði skilið við Sálina og gerði í kjölfarið allt vitlaust með Bítlavinafélaginu og þar á eftir með hljómsveitinni Ný dönsk. Lagið er að sjálfsögðu, Í brekkunni,“ sagði Daddi. En Jón og Stefán Hilmarsson, söngvari Sálarinnar, munu sameinast á ný í Brekkunni í Hörpu í janúar. „Jón Ólafsson er að koma að þessum tónleikum í fyrsta skipti, en eins og margir aðrir íslenskir tónlistarmenn þekkir hann Eyjalögin nokkuð vel. Hann stjórnaði fyrr í sumar stórtónleikum á vegum Vestmannaeyjabæjar, þar sem blandað var saman vinsælum Eyjalögum og þekktum íslenskum dægurlagaperlum. Jón var hinsvegar búinn að ganga frá samkomulagi við tónleikahaldara Eyjatónleikanna í Hörpu strax á vormánuðum og því má segja að það hafi komið sér nokkuð vel fyrir hann að fá smá smjörþef af Eyjalögunum í sumar.“ Auk hljómsveitarstjórnar leikur Jón að sjálfsögðu á píanó og hljómborð. „Ásamt forsprakka Sálarinnar sálugu, Stefáni Hilmarssyni, verða söngvarar kvöldsins þeir Pálmi Gunnarsson, Bergþór Pálsson, Stefanía Svavarsdóttir, Matti Matt, Agnes Björt Andradóttir, Jóna Alla, Kristján Gísla og Alma Rut.“

Kristján Gísla og Alma Rut láta sig ekki vanta á tónleikana í ár frekar en undanfarin ár.

Hljómsveitin er ekki af verri endanum en ásamt Jóni skipa hana Eyjamennirnir Eiður Arnarsson, sem hefur verið á bassa á öllum tónleikunum og Birgir Nielsen Þórsson á trommur. Kjartan Valdemarsson á hljómborð og harmonikku, Jón Elvar Hafsteinsson á gítar, Ari Bragi Kárason á trompet, Sigurður Flosason á Saxafón, flautu og slagverk og nýjasti liðsmaður sveitarinnar Matthías Stefánsson á gítar og fiðlu.

„Eyjatónleikarnir í Hörpu eru því svo miklu meira en bara tónleikar. Þetta er tindrandi töfrastund – allur pakkinn,“ sagði Daddi að lokum. Miðasala er í fullum gangi og geta áhugasamir nálgast miða á tix.is og harpa.is sem og í miðasölu Hörpu í síma 528 5050.

Hér að neðan má sjá myndir frá Óskari Pétri Friðrikssyni frá Eyjatónleikunum í Hörpu á síðasta ári.