Bæjarstjórnarfundur var haldinn í gærkvöldi í Einarsstofu. Þrettán mál voru á dagskrá fundarins og fjölmörg mál til umfjöllunar. Áberandi var á fundinum hversu ítrekað bæjarfulltrúar Sjálfstæðisflokksins ræddu um samskiptaleysi, skort á gögnum og óvandaðri stjórnsýslu.

Fengu svar 10 mínútum fyrir fundinn

Á fundinum var tekin ákvörðun um að þeir fulltrúar sem sitja í bæjarráði Vestmannaeyja myndu sitja í byggingarnefnd vegna viðbyggingar við Hamarsskóla. Kom fram í máli bæjarfulltrúa Sjálfstæðisflokksins að þeir hefðu ítrekað óskað eftir upplýsingum um hvernig hópurinn ætti að vera skipaður og hvort að flokkurinn ætti að tilnefna fulltrúa í hópinn. Svar barst 10 mínútum fyrir bæjarstjórnarfundinn í tölvupósti og sagði forseti bæjarstjórnar að hann hefði látið hjá líða að svara fyrirspurnum minnihlutans þar sem “ekkert nýtt væri í málinu.”

Ferli raforkukaupa gagnrýnd

Raforkukaup sveitarfélagsins voru einnig til umræðu. Þó bæjarfulltrúar væru allir sammála því að gott væri að ná raforkuverði niður, spurðu fulltrúar Sjálfstæðisflokksins meirihluta H- og E-lista hvort að hægt hefði verið að ná raforkuverðinu enn lengra niður hefðu vinnubrögð verið öðruvísi.

Starfsmenn mega ekki lengur svara fyrirspurnum bæjarfulltrúa

Á fundinum gagnrýndu fulltrúar Sjálfstæðisflokksins þá stjórnsýslu sem var viðhöfð í málinu en Hildur Sólveig Sigurðardóttir oddviti Sjálfstæðisflokksins hafði áður lagt fram bókun í bæjarráði þar sem hún gagnrýndi að hafa lesið um málið í fjölmiðlum fyrst, hún fagnaði lægri orkukostnaði og væri með engum hætti að gagnrýna þann aðila sem samið var við heldur fyrst og fremst þá stjórnsýslu sem viðhöfð var.

Aðrir bæjarfulltrúar Sjálfstæðisflokksins tóku undir sjónarmið Hildar á fundinum, en sögðu jafnframt í bókun að “bæjarfulltrúar gagnrýni einnig harkalega að aðgengi þeirra að starfsfólki sveitarfélagsins og eðlileg upplýsingagjöf hefur verið takmörkuð verulega af núverandi meirihluta.” Er tekið fram að starfsmönnum sé ekki lengur heimilt að svara fyrirspurnum frá fulltrúum Sjálfstæðisflokksins nema þær fari í gegnum bæjarstjóra og bæjarstjóri taki sér mun lengri tíma til að svara fyrirspurnum bæjarfulltrúa en aðrir starfsmenn hafi gert. Segja fulltrúar Sjálfstæðisflokksins að um sé að ræða enn eina staðfestinguna á því að kjörorðin og boðskapurinn í aðdraganda síðustu kosninga hjá núverandi meirihluta hafi verið markleysa.

Fíflagangur segir meirihlutinn

Í kjölfar bókunar Sjálfstæðisflokksins var óskað eftir fundarhléi en að því loknu kom Njáll Ragnarsson oddviti E-listans upp í pontu og sagðist þurfa að bregðast við þessum fíflagangi líkt og hann orðaði það. Vísaði hann í bókun til bæjarmálasamþykktar og sveitarstjórnarlaga þar sem kemur fram að bæjarfulltrúar skuli beina fyrirspurnum til bæjarstjóra. Sagði hann bæjarfulltrúa Sjálfstæðisflokksins kvarta yfir því að að þurfa að fara eftir lögum og samþykktum og það sé kostulegt að oddviti Sjálfstæðisflokksins skuli í sama máli gagnrýna slæleg vinnubrögð og gerast uppvís að því að hvetja til brota á lögum.

Vantraust á starfsmenn

Hildur Sólveig kom þá aftur í pontu og sagði að það hefði alltaf tíðkast að gott aðgengi væri á milli allra bæjarfulltrúa og starfsmanna. Benti hún einnig á að með þessum hætti væri einnig verið að leggja vantraust á starfsmenn sveitarfélagsins þar sem þeim væri ekki treystandi til svara.

Málefni Náttúrustofunnar

Bæjarfulltrúar Sjálfstæðisflokksins óskuðu eftir því að málefni Náttúrustofu Suðurlands yrðu  til umræðu. Af umræðu fundarins mátti dæma að ástæður þess að farið var fram á umræðu væri sú að engin fundargerð frá Náttúrustofunni hafði verið skráð þrátt fyrir að lágmark 10 fundir hafi verið haldnir frá árinu 2018 og engin fundargerð hafi verið staðfest af bæjarstjórn frá því í ágúst 2018.  Kom bæjarstjóri, Íris Róbertsdóttir, upp í pontu og sagðist ekki hafa geta undirbúið sig því að þessu máli hefðu ekki fylgt nein gögn.

Tekur ekki tvo sólarhringa að svara

Trausti Hjaltason bæjarfulltrúi Sjálfstæðisflokksins sagði í framhaldi að það hefðu engin gögn geta fylgt með, þar sem engin gögn hafa verið birt frá stofunni í tæp tvö ár. Sagði hann þá að fulltrúar Sjálfstæðisflokksins í ráðum og nefndum sveitarfélagsins væru ítrekað að gagnrýna að ekki fylgi fundargögn með fundarboðum. Hildur Sólveig kom að endingu upp í pontu og sagði að bæjarstjóra hefði verið frjálst að senda sér tölvupóst vegna málsins og fá upplýsingar um hvað hún ætlaði að ræða. Sagði Hildur að hún myndi ekki taka sér tvo sólarhringa til þess að svara einföldum fyrirspurnum.

 

Fyrir þá sem eru spenntir að glöggva sig betur á fundinum má hér finna rúmlega fjóra klukkutíma af gæða efni: