Á tímum alheimsfaraldurs þar sem ástandið í Eyjum hefur verið sérstaklega tvísýnt hóf Páll Magnússon alþingismaður páskahátíðina með því að segja upp áskrift að Eyjafréttum og senda undirrituðum í leiðinni kaldar kveðjur. Ástæðu skírdagsuppsagnarinnar kvað hann vera þá að ég birti ekki tiltekna facebookfærslu bæjarstjórans í Vestmannaeyjum síðdegis á mánudag. Það þykir alþingismanninum ljóst að stafi af „persónulegri óvild“ minni í garð bæjarstjórans.
Páll Magnússon ræður svo sem auðvitað hvort hann kaupir áskrift að blöðum eða hvort hann segir upp áskrift. Það er hins vegar gróf ásökun og staðlaus að ég þjáist af „persónulegri óvild“ í garð bæjarstjórans. Ásökun þingmannsins vísa ég til föðurhúsanna. Páll Magnússon þingmaður og Íris Róbertsdóttir bæjarstjóri nota ýmis tækifæri til þess að rýra trúverðugleika minn sem ritstjóra og miðilsins en það hefur aldrei bitnað á aðgengi þeirra að miðlinum. Allt sem þau hafa sent til birtingar hefur fengið birtingu.
Nú er það svo að tilkynningum frá almannavarnayfirvöldum, bæjaryfirvöldum og fleirum hefur rignt inn til okkar á Eyjafréttum undanfarna daga og vikur, eðlilega. Að sjálfsögðu höfum við birt þær. Við biðjumst ekki afsökunar á því að ein og ein facebookfærsla birtist ekki hjá miðlinum. Degi seinna eru önnur mál komin á dagskrá. Það er bara eins og gengur og óþarft að rifja upp fyrir sjóuðum manni í fjölmiðlastarfi.
Afar sérstakt og næstum því broslegt var annars að heyra svo nýyfirlýstan fyrrverandi áskrifanda Eyjafrétta, Pál Magnússon, mæta í dag í hádegisfréttir RÚV til að taka undir áhyggjur af stöðu einkarekinna fjölmiðla og hvetja til þess að opinberum stuðningsaðgerðum við þá yrði flýtt. Róðurinn var þungur fyrir en veirukreppan hefur þyngt hann svo mjög að komið er í hreint óefni. Miðað við framgöngu þingmannsins í gær hefði verið heiðarlegt af honum að taka fram að hann hefði áhyggjur af öllum miðlum svo fremi sem þeir birti tafarlaust facebookfærslur bæjarstjórans í Vestmannaeyjum.
Þá vekur tímasetningin á þessu upphlaupi Páls Magnússonar sérstaka eftirtekt. Mér þykir forgangsröðun þingmannsins hreint ótrúleg þegar íslenskt samfélag er að takast á við ótrúlega erfiðleika, bæði heilsufarslega og efnahagslega. Atvinnulífið stendur í gríðarlegri varnarbaráttu og stefnir t.d. í allt að 25% atvinnuleysi á svæðum innan Suðurkjördæmis. Undir þeim kringumstæðum ákveður oddviti kjördæmisins að taka þennan slag. En það flýgur jú hver eins og hann er fiðraður.
Eyjafréttir er lítill, en sögufrægur héraðsfréttamiðill. Sögu hans hefur verið gerð góð skil á undanförnum árum, til að mynda með því að gera allt efni hans frá upphafi aðgengilegt á timarit.is. Eyjamenn þekkja það grettistak sem forverar mínir í starfi, og allur sá fjöldi sem hér hafa starfað, hafa lyft. Í dag höldum við úti vefnum eyjafrettir.is og gefum út áskriftarblað á tveggja vikna fresti. Fyrir veirufaraldurinn tókst með herkjum að láta enda ná saman í rekstrinum en nú blasir við önnur og dekkri mynd líkt og hjá fjölda annarra fyrirtækja. Auglýsingatekjur hafa dregist mjög saman og í prentmiðlinum okkar auglýsir til að mynda Vestmannaeyjabær eingöngu í einstaka tilfellum. Að baki liggur sú stefna bæjarstjórans Írisar Róbertsdóttur „ … að horfa til þess að auglýsa sérstaklega hjá þeim aðilum sem eru að gefa út efni án endurgjalds í Vestmannaeyjum.“
Framleiðsla ókeypis fjölmiðlaefnis er ekki ókeypis en ríkar kröfur heyrast um það úr líklegustu og ólíklegustu áttum að allir skuli hafa aðgang að því „án endurgjalds“.
Páll Magnússon er ekki lengur áskrifandi en honum er meira en velkomið að læðast áfram inn á vefinn okkar og fylgjast með tíðindum í Eyjum. Endurgjaldslaust. Árásir þingmannsins og bæjarstjórans á mig persónulega eru í besta falli vindhögg. Þau hvetja mig til þess að halda áfram að vinna mína vinnu. Árásir á fyrirtækið sem réði mig í vinnu eru alvarlegri, fyrirtæki sem er með 14 einstaklinga að jafnaði á launaskrá í hverjum mánuði. Þær árásir þurfa þessir kjörnu fulltrúar vonandi einhvern tímann að svara fyrir.
Ég óska Páli Magnússyni og Vestmannaeyingum gleðilegra páska.
Sindri Ólafsson
ritstjóri Eyjafrétta
