Öllum starfsmönnum Isavia við flugvöllin í Vestmannaeyjum hefur verið sagt upp störfum. Þetta staðfesti Guðjón Helgason, upplýsingafulltrúi Isavía, í samtali við mbl.is.
Flugvöllurinn þjónar þó áfram kennsluflugi, sjúkraflugi og einkaflugi og ljóst að þörf er á einhverjum starfskröftum. „Nú tekur við vinna við að greina starfsemi flugvallarins í samstarfi við starfsmennina,“ segir Guðjón, en umræddir starfsmenn eiga á bilinu þriggja til sex mánaða uppsagnarfrest. Öllum starfsmönnum verði boðið skert starfshlutfall á vellinum.
Þetta þýðir að allir sem starfa við samgöngur í Vestmannaeyjar starfa í dag á uppsagnafresti. Svo sannarlega fordæmalausir tímar.
Í samtali við Eyjafréttir í byrjun september, þegar Ernir hætti áætlunarflugi, sagði Guðjón ákvarðanir um þjónustustig einstakra flugvalla hins vegar á forræði samgöngu- og sveitarstjórnarráðuneytis. „Í dag starfa þrír starfsmenn Isavia Innanlandsflugvalla á Vestmannaeyjaflugvelli í þremur stöðugildum. Það er of snemmt að segja til um hvort þessi ákvörðun hafi áhrif á störf þeirra. Ákvarðanir um þjónustustig einstakra flugvalla í innanlandsflugvallakerfinu eru á forræði samgöngu- og sveitastjórnarráðuneytisins. Núverandi þjónustustig er skilgreint í þjónustusamningi milli Isavia og ráðuneytisins. Það þjónustustig hefur tekið mið af áætlunum flugfélaga á hverjum flugvelli.
Framtíð Vestmanneyjaflugvallar er, eins og annarra flugvalla í innanlandsflugvallakerfinu, í höndum samgöngu- og sveitarstjórnarráðuneytisins. Stjórnvöld taka ákvarðanir sem snerta þjónustustig og fjölda flugvalla í innanlandsflugvallakerfinu. Eins og staðan er í dag hafa ekki verið uppi hugmyndir um önnur verkefni fyrir flugvöllinn.“
Það er því ljóst að framtíð flugvallarinns og flugsamgangna til Vestmannaeyja liggur hjá Sigurði Inga Jóhannssyni, samgöngu- og sveitarstjórnarráðherra.
