Nýjar reglur um samkomutakmarkanir vegna COVID-19 hafa tekið gildi frá og með deginum í dag, þ.e. 20. október, og gilda þær til 10. nóvember að öllu óbreyttu. Fjarlægðarmörk eru nú 2 metrar og reglur eru um grímunotkun ef ekki er hægt að halda þeim fjarlægðarmörkum. Leikskólar og frístundaver Vestmannaeyjabæjar hafa brugðist við þessum nýju reglum.
Ætlunin er að taka á móti börnunum úti þegar veður leyfir en að öðru leyti geta foreldrar/forráðamenn komið inn í fataherbergin og skulu þá staldra eins stutt við og kostur er. Þá verða þeir að huga vel að 2 metra reglunni, setja upp grímu ef þeir geta ekki tryggt hana eða bíða úti þar til aðstæður eru betri í fataherberginu. Líkt og áður eru leikskólarnar og frístundaverið lokuð óviðkomandi aðilum. Það er mikilvægt að allir standi saman og virði þessar reglur til að draga úr hættu á smiti sem gæti haft þær afleiðingar að loka þyrfti deildum/kjörnum á leikskólunum.
