Í liðinni viku voru 20 ökumenn kærðir fyrir að aka of hratt um vegi á Suðurlandi og af þeim voru 13 á ferðinni á svæðinu við Vík og Kirkjubæjarklaustur. Þetta kemur fram í dagbók lögreglunnar á Suðurlandi en 2.228 ökumenn voru kærðir fyrir að aka of hratt um umdæmið á liðnu ári en 3.924 árið á undan. Mestu munar þar um þann fjölda erlendra ferðamanna sem ekki skiluðu sér til landsins á síðasta ári.
“Rétt er að hafa í huga að árið 2018 voru 1.667 stöðvaðir vegna hraðakstursbrota og því er það stífa eftirlit sem við höfum verið að sinna að skila sér í þeim fjölda sem nú er undir. Áfram verður haldið með umferðareftirlitið enda ljóst að með því að sinna því vel er lögreglan að bjarga mannslífum. Flest alvarleg slys í umferðinni eru tengd með einhverjum hætti hraðakstri eða ástandi ökumanna,” segir í dagbókarfærslunni.
