Bæjarstjóri upplýsti á fundi bæjarráðs í gær um fund sem hún og bæjarstjóri Sveitarfélagsins Hornafjarðar áttu með þingmönnum í Suðurkjördæmi mánudaginn 15. febrúar sl. Á fundinum var farið yfir stöðu yfirfærslu dvalar- og hjúkrunarheimila sveitarfélaganna tveggja til ríkisins og skort á upplýsingum frá heilbrigðisráðuneytinu og Sjúkratryggingum Íslands. Jafnframt óskaðu bæjarstjórarnir eftir því við þingmennina að velferðarnefnd Alþingis tæki málið upp. Í dag barst bæjarstjórum Vestmannaeyja, Hornafjarðar og Akureyrar fundarboð frá velferðarnefnd Alþingis um fund með nefndinni þann 23. febrúar nk.

Ekki upplýst um framhaldið
Jafnframt gerði bæjarstjóri grein fyrir því að enginn aðili sýndi því áhuga að reka Hraunbúðir skv. auglýsingu sem Sjúkratryggingar Íslands birtu fyrir um tveimur vikum síðan, þar sem óskað var eftir áhugasömum aðilum. Enn hafa SÍ ekki upplýst Vestmannaeyjabæ um framhaldið um það hvaða rekstraraðili muni taka yfir starfsemina þann 1. apríl nk. Enn þá er eftir viðbrögðum heilbrigðisráðuneytisins og Sjúkratrygginga Íslands um framhaldið. Þessi margra mánaða bið er orðin óboðleg öllum sem málið varðar.

Bæjarstjóri sendi Sjúkratryggingum Íslands þann 15. janúar sl. bréf varðandi yfirfærsluna. Hefur því erindi aðeins verið svarað að hluta sbr. bréf Sjúkratrygginga Íslands sem barst bæjarstjóra þann 17. febrúar, rúmum mánuði eftir beiðni Vestmannaeyjabæjar. Þá mun bæjarstjóri ítreka ósk um svör frá forstjóra Sjúkratrygginga Íslands um hver taki við rekstri Hraunbúða.

Hafa greitt 500 milljónir með rekstrinum
Frá árinu 2012 hefur Vestmannaeyjabær greitt tæpar 500 m.kr. með rekstri Hraunbúð, sem ríkið á að bera ábyrgð á og fjármagna. Vestmannaeyjabær er og mun áfram verða í samfloti með öðrum sveitarfélögum sem sagt hafa upp samningi við Sjúkratryggingar Íslands um rekstur dvalar- og hjúkrunarheimila.

Mikil vonbrigði
Bæjarráð lýsir yfir miklum vonbrigðum með seinagang Sjúkratrygginga Íslands (SÍ) vegna yfirfærslu á rekstri Hraunbúða. Bæjaryfirvöld ákváðu í lok maí á síðasta ári að endurnýja ekki samning við SÍ um rekstur Hraunbúða sem rann út 31. desember sl. (uppsögn var svo frestað til 31. mars 2021) og var stofnuninni og heilbrigðisráðherra tilkynnt um ákvörðun bæjarins 26. júní 2020 þannig að SÍ gæfist nægur tími til þess að undirbúa yfirfærsluna.

Ráðaleysi virðist ríkja
Bæjarráð tekur undir með bæjarstjórn Akureyrar að algjört ráðaleysi virðist ríkja innan SÍ um hvað gera skuli við hjúkrunarheimili í þeim sveitarfélögum sem hafa ákveðið að endurnýja ekki samninga um rekstur. SÍ auglýsti eftir nýjum rekstraraðila tæpum sjö mánuðum eftir að samningnum var sagt upp og er því enn óvissa ríkjandi um hver kemur til með að reka heimilin frá og með 1. apríl nk.

Leita lögfræðiaðstoðar
Bæjarráð ítrekar kröfu um að þessari óvissu verði eytt án tafar vegna allra þeirra sem hlut eiga að máli þ.e. íbúa, aðstandenda og ekki síst starfsfólks sem á rétt á að njóta öryggis og fyrirsjáanleika í starfsumhverfi sínu. Í ljósi stöðunnar í viðræðum við Sjúkratrygginga Íslands, hefur Vestmannaeyjabær ákveðið að leita sér sérhæfðrar lögfræðiaðstoðar um yfirfærsluna.