Staða framkvæmda og úthlutun á þjónustuíbúðum fatlaðs fólks við Strandvegi 26 var til umræðu á fundi fjölskyldu- og tómstundaráðs í vikunni. Vestmannaeyjabær hefur úthlutað öllum sjö þjónustuíbúðunum til þjónustuþega sem allir uppfylla skilyrði til úthlutunar. Mikil tilhlökkun er að flytja inn sem og að taka í gagnið nýjan þjónustukjarna sem á að nýtast m.a. íbúum í umræddum þjónustuíbúðum. Beðið er því með óþreyju eftir því að framkvæmdaraðilar ljúki verkinu og hægt verði að flytja inn.

Ólafur Þór Snorrason framkvæmdastjóri Umhverfis- og framkvæmdasviðs mætti á fundinn og gerði grein fyrir framgangi verksins og mat hans á hugsanlegum verklokum. Að hans sögn gengur framkvæmdin ágætlega. Unnið er að raflögnum og málun og eftir páska verður byrjað að setja upp innréttingar. Áhersla sé á að öllum yrtri framkvæmdum sé lokið og húsnæðið allt hafi öryggisvottun áður en flutt sé inn. Ólafur segir að svo framarlega sem ekkert óvænt komi upp gæti verkinu verið lokið mánaðarmótin maí/júní.

Ráðið þakkaði Ólafi fyrir upplýsingarnar og tekur undir tilhlökkun væntanlegra íbúa í nýju þjónustuíbúðunum. Ráðið hvetur framkvæmdaaðila að hraða framkvæmdum þannig að tímasetningar standi varðandi það að flytja inn í nýjar þjónustuíbúðir sem og nýjan þjónustukjarna.