Huginn VE kom úr Smugunni með alls um 1.300 tonn af ferskum og frosnum makríl sem verið er að landa í Eyjum.

Kap VE er á miðunum og gert er ráð fyrir að skipið leggi af stað heimleiðis í kvöld eða á morgun með fullfermi, um 800 tonn.

Ísleifur VE er um það bil að koma í Smuguna og fer í það fyrst að aðstoða Kap við að fylla sig og koma sér heim.

„Veiðin hefur verið upp og ofan það sem af er en ef veiðist vel næstu daga og vikur og fram í miðjan september verður hiklaust hægt að tala um ágætis vertíð,“ segir Sindri Viðarsson, sviðsstjóri uppsjávarsviðs Vinnslustöðvarinnar.

„Makríll hefur varla fundist í veiðanlegum torfum í íslenskri lögsögu í sumar en Norðmenn eru hins vegar að veiðum núna í sinni lögsögu rétt austan við Smugulínuna.

Makríllinn er hvað viðkvæmastur um þetta leyti árs þegar hann er í ætisleit og fitnar hratt. Þegar líður á sumarið og fram á haust gengur fitan inn í holdið og það styrkist. Varan verður að sama skapi betri og verðmætari.“

  • Óskar, stýrimaður á Ísleifi, tók myndina af Hugin á miðunum í Smugunni en Trausti Hjaltason tók myndirnar af löndun úr Hugin.