Starfsfólkið í Safnahúsinu ætlar að sjá til þess að engum leiðist í desember en þau ætla að bjóða upp á ein 3 jóladagatöl. Nánari lýsingu á þeim upplýsingar um það hvar þau má finna má sjá hér að neðan.
Jóladagatal Listasafns Vestmannaeyja í boði Listvina.
Listasafn Vestmannaeyja telur um 900 listaverk eftir um 100 listamenn. Hér kennir ýmissa grasa, stærsta safn Kjarvalsmálverka utan Kjarvalsstaða eða 37 verk eftir meistarann, verk eftir aðra helstu listamenn þjóðarinnar á borð við Ásgrím Jónsson, Ríkharð Jónsson, Júlíönu Sveinsdóttur, Sverri Haraldsson, Engilbert Gíslason, Einar Jónsson og svo miklu fleiri. Einarsstofa dugar vel undir smærri sýningar og hér eru um 20-30 málverkasýningar settar upp á hverju ári. En við viljum gera safnið okkar enn aðgengilegra og það verður seint gert án þess að fá málverkasal. En við beitum ýmsum aðferðum við að kynna safnið okkar eins og unnt er. Ein aðferðin er hið stórskemmtilega jóladagatal okkar þar sem við drögum fram 24 málverk valin nánast af handahófi til að sýna hversu margþætt safnið er. Við opnum hvern dag einn glugga, eins og hvert annað jóladagatal en í stað sætinda rífum við utan af einu málverki og gerum ofurlitla grein fyrir höfundi og verkinu.
Við höfðum þann háttinn á í dag að fá bæjarstjórann okkar, Írisi Róbertsdóttur, til að koma opna fyrsta gluggann jóladagatalsins og tókum það upp á myndband sem unnt er að horfa á hér á síðunni.
Jóladagatal Bókasafns Vestmannaeyja
Starfsfólk Safnahúss Vestmannaeyja hefur tekið sig saman og gert jóladagatal. Þau munu skiptast á að lesa einn kafla á dag úr bókinni Á baðkari til Betlehem eftir Sigurð Valgeirsson og Sveinbjörn I. Baldvinsson. Bæði höfundar og útgefandi gáfu góðfúslegt leyfi fyrir verkefninu.
Upptökur af upplestrinum munu birtast á facebook síðu Bókasafnsins kl. 8.00 hvern morgun til og með 24. desember og hjálpar vonandi bókelskum krökkum að stytta biðina fram að jólum.
Njótið vel!
Hér er linkur á facebook síðu Bókasafnsins: https://www.facebook.com/safnahus
Hér er linkurinn að fyrsta upplestrinum: https://www.facebook.com/safnahus/videos/327803255465206
Dagatal fyrir bragðlaukana
Multicultural Center Vestmannaeyjar ætlar að hafa jóladagatal á Facebook í desember! Til þess að fagna fjölbreytileikanum ætlum við að hafa uppskriftir af jólamat frá mismunandi löndum í 24 daga í desember!
Ein uppskrift á dag mun birtast á facebook síðunni og tilvalið fyrir nýungagjarna sælkera að prófa sig áfram með jólauppskriftir frá Rúmeníu, Þýskalandi, Hollandi, Spáni, Portúgal og Póllandi svo eitthvað sé nefnt. Einnig munu birtast 2 gamlar og góðar frá Íslandi. Uppskriftirnar verða birtar bæði á ensku og íslensku svo að sem flestir geti notið þeirra.
Hér er linkur á facebooksíðu multicultural center Vestmannaeyjar: https://www.facebook.com/MulticulturalCenterVestmannaeyjar
