Lífleg umræða um samgöngumál fór fram á fundi bæjarráðs í gær. Hörður Orri Grettisson, framkvæmdastjóri Herjólfs ohf., kom á fund bæjarráðs og greindi frá stöðu félagsins. Meðal annars fór Hörður Orri yfir farþegafjölda og rekstur ársins 2021, rekstraráætlun fyrir árið 2022, rekstrarniðurstöðu janúarmánaðar 2022 og stöðuna á mönnun.

Ánægjulegt er að bæta eigi úr upplýsingagjöf
Þá lagði fulltrúi D lista fram eftirfarandi bókun. “Ánægjulegt er að bæta eigi úr reglulegri upplýsingagjöf til kjörinna fulltrúa vegna málefna Herjólfs ohf. í kjölfar athugasemda bæjarfulltrúa Sjálfstæðisflokks á síðasta bæjarstjórnarfundi. Samkvæmt eigendastefnu Herjólfs ohf. sem meirihluti bæjarstjórnar samþykkti kemur fram að samskipti milli eigenda og fyrirtækisins skuli vera eftir formlegum leiðum og leitast skal við að beina þeim í farveg aðalfunda og reglubundinna eigendafunda. Upplýst umræða um félagið gagnast m.a. kjörnum fulltrúum annars vegar sem fulltrúum eigenda félagsins og hins vegar í hagsmunagæslu samfélagsins. Auk þess uppfyllir bæjarstjórn betur með opinni umræðu um málefni félagsins ákvæði eigendastefnu þar sem stendur að; “handhafar eigendavalds leitast við að efla upplýsta og lýðræðislega umræðu um málefni Vestmannaeyjaferjunnar Herjólfs ohf. og samgöngur milli lands og Eyja á vettvangi sveitarstjórnarinnar og á fundum eigenda.””

Allir kjörnir fulltrúar bera ábyrgð
Því var svarað með bókun frá fulltrúum E og H lista. Upplýsingaflæði frá Herjólfi ohf. til bæjarráðs og bæjarstjórnar verður gott hér eftir sem hingað til. Fulltrúar félagsins hafa komið reglulega inn á fundi bæjarráðs og fundað með bæjarstjórn. Það er því ekkert nýtt að kjörnir fulltrúar séu upplýstir um stöðu félagsins. Þá er sérstaklega ánægjulegt að fulltrúi sjálfstæðisflokksins í bæjarráði átti sig nú á því að allir kjörnir fulltrúar bera ábyrgð á rekstri félagsins. Samstaða um samgöngumál er mikilvæg nú sem aldrei fyrr. Gagnkvæm virðing og traust þarf að ríkja og kjörnir fulltrúar þurfa að sameinast um að byggja upp slíkt traust.

Að lokum bókaði fulltrúi D lista. “Fulltrúar Sjálfstæðisflokksins hafa aldrei hlaupist undan ábyrgð gagnvart málefnum Herjólfs þrátt fyrir ítrekaðar ásakanir meirihluta um slíkt.”