Það var ánægjulegt að sjá í skrifum Félaga Ragnars Óskarssonar í Eyjamiðlunum í vikunni að enn virðist honum og öðrum vinstrimönnum í Eyjum standa verulegur stuggur af mér og málflutningi mínum og enn ánægjulegra var að uppgötva að Félagi Ragnar skuli enn minnast mín í pólitískum bænum sínum. Ég las því alla grein hans með miklum áhuga og ánægju
„Það mér sagt var“ stíll Félaga Ragnars og lærimeistarans Gróu gömlu á Leiti
Það sem mér þykir aftur á móti verra er að Félagi Ragnar, sem áður fyrr var beittur og skoðanafastur og hafði miklar skoðanir á mönnum og málefnum, skuli nú dottinn í það að feta í fótspor Gróu gömlu á Leiti og bera út sögur byggðar á ónafngreindum aðilum. Svona „það mér sagt var“ stíll eins og einhverjir af yngri kynslóðinni myndu kannski orða það.
Ef til vill kemur það með ellinni að hugrekkið minnkar og bitið fer úr pennanum og þá getur verið gott að feta bara slóð Gróu gömlu. Þeir sem yngri eru kannast líklega lítt við Gróu gömlu en nota þá kannski önnur orð um sambærilegt atferli. Ég veit ekki hvort það er í dag kallað „kaffistofukakkalakkar“ en einhversstaðar heyrði ég það orð fyrir skömmu.
Gott að sjá að enn er smá neisti og vottur af hroka í Félaga Ragnari
Hins vegar gladdist ég mjög að sjá að enn er smá neisti í Félaga Ragnari, því hann náði að setja örlítið „dass“ af sínum skemmtilega og eðlislæga hroka í skrifin. Hann er greinilega ekki dauður úr öllum æðum karlinn.
Félagi Ragnar á væntanlega við mig þegar að hann talar um „mann ofan af landi, Grím Gíslason“. Ekki veit ég alveg hvað Ragnar á við með þessum orðum því ég veit ekki betur en ég hafi átt mitt heimili í Vestmannaeyjum í rúm 60 ár, að undanskildum 3 árum eftir Heimaeyjargosið 1973, og eigi enn hér heimilisfesti. Ragnari til upplýsinga bý ég nú í Áshamri 63 er búinn að búa þar síðastliðinn hálfan annan áratug eða svo.
Kannski má finna svokallað „fólk ofan af landi“ á einhverjum framboðslistum?
Félagi Ragnar ætti kannski að líta sér nær í þessum efnum og skoða hve lengi, sumir af frambjóðendum hjá amk öðru framboði vinstri meirihlutaflokkanna í Eyjum, sem hann örugglega styður, hafa búið hér. Það er að segja ef að það er einhver sérstök breyta hjá honum sem hann leggur áherslu á að halda til haga. Hann gæti t.d. bara kíkt á oddvitasætin í þeim efnum en ekki væri verra fyrir hann að leitaði lengra niður eftir listunum í þessari rannsókn. Reyndar finnst mér sjálfum þessi nálgun hans frekar heimóttaleg og gamaldags, því í mínum huga eiga þeir hér heima sem hér hafa heimilsfesti. Hér á ég að minnsta kosti heima.
Tel mig vera lukkunnar pamfíl og vakna bæði og sofna glaður og sæll?
Ég verð sorgmæddur að heyra að Félagi Ragnar heldur að ég sé leiður, gramur og reiður út í allt og alla. Ég sem vakna glaður alla morgna og sofna glaður á hverju kvöldi, enda tel ég mig hafa verið lukkunnar pamfíl í lífinu og hef yfir engu að kvarta í þeim efnum.
Það er hins vegar leitt ef að Félagi Ragnar telur málefnalega gagnrýni á eitt og annað vera nöldur, tuð, leiða og gremju. Öðru vísi mér áður brá.
Hefur hann þá verið nöldrandi og leið gremjuskjóða alla tíð?
Ef að Félagi Ragnar er á þeirri skoðun nú að gagnrýn umræða sé leiði, gremja og reiði þá ætti hann kannski að fara í smá sjálfsskoðun, því hann hefur jú verið öflugur í almennri umræðu í gegnum tíðina og ekki alltaf dregið af sér í gagnrýni á menn og málefni. Kannski að hann hafi bara verið nöldrandi og leið gremjuskjóða alla sína tíð? Það er amk ástæða til að velta þeirri spurningu upp í ljósi skrifa hans nú.
Ef að ég stjórnaði kosningabaráttu D-listans væri hún örugglega beinskeyttari
Ég neita því ekki að það gladdi hjarta mitt óendanlega að sjá þá gríðarlegu trú sem Félagi Ragnar, og „heimildarfólk“ hans, hefur á mér að það skuli telja mig stjórna kosningabaráttu Sjálfstæðisflokksins í Eyjum og vera bæjarstjóraefni að loknum kosningum.
Auðvitað veit Félagi Ragnar það vel að mín fingraför er hvergi að finna í kosningabaráttu Sjálfstæðisflokksins að þessu sinni. Ef að ég stjórnaði þar á bæ væri baráttan örugglega mun hvassari og beinskeyttari en hún er og ég myndi óhikað benda af krafti á þau fjölmörgu mál sem ég tel núverandi meirihluta hafa staðið illa að og sauma fast að þeim. Þar er af mjög, mjög mörgu að taka.
„Grímsi bæjó“ hljómar bara vel!
Ég hef gagnrýnt sumt af þessum málum í skrifum mínum undanfarin ár, en ég er alls ekki viss um að frambjóðendur Sjálfstæðisflokksins séu mér sammála í þeim efnum, enda hafa þeir á engann hátt tekið undir gagnrýni mína svo ég hafi séð. Hins vegar átta ég mig á því að skrif mín hafa hitt nokkuð vel í mark og sært meirihlutann úr því að Félagi Ragnar, sér ástæðu til að vara fólk sérstaklega við mér. Annars væri hann ekki að eyða púðri í mig, óbreyttan borgara í Eyjum, sem ekki er í framboði.
Varðandi hugleiðingarnar Félaga Ragnars um að ég sé bæjarstjóraefni D-listans verð ég að segja að ég er ákaflega upp með mér af því að vera kominn í nafnapottinn í þeim efnum. Ég er upp með mér af því mikla áliti sem vinstri menn í Eyjum hafa á mér að telja mig verðugan kandidat.
Grímsi bæjó hljómar bara helvíti vel, eða er það ekki?
Hef ekki enn unnið í lottóinu en miði er alltaf möguleiki
Hins vegar tel ég rétt að minna Félaga Ragnar á að ég hef undanfarna áratugi spilað í Lottóinu og ýmsum öðrum happadrættum en aldrei unnið þann stóra, þó að mínar tölur hafi alltaf verið með í hattinum þegar dregið hefur verið. Mér finnast samt eiginlega meiri líkur á að ég vinni þann stóra í Lottóinu heldur en í „bæjarstjóralottóinu“, en ég er glaður að Félagi Ragnar og hans fólk hafi sett mitt nafn í pottinn í því lottói. Maður vinnur ekki nema að taka þátt og miði er jú möguleiki, eins og segir í auglýsingunni, þó að vinningslíkurnar séu hverfandi.
Já svo er nú það .
Grímur Gíslason
