Í dag, fimmtudaginn 30. júní kl. 17.30 opnar Ólafur Hjálmarsson, Eyjamaður og hagstofustjóri sýningu á landa- og siglingakortum frá hinum ýmsu tímum í Einarsstofu.

Ólafur segir sögur kortanna. „Í allt eru þetta um 70 landakort og gamlar koparstungumyndir sem tengjast Íslandi. Þau  elstu eru frá 1570 ná til 1827. Reyni ég að stikla á stóru í sögu kortagerðar á Íslandi og er gaman að sjá hvernig menn sáu fyrir sér lögun landsins. Sérstaklega í upphafi þegar kortin eru byggð á sögusögnum, ævintýrum og fornritum. Skreytt með sæskrímslum, hvölum og furðuverum sem sóttar voru í allskonar sagnir frá sjófarendum,“ segir Ólafur Hjálmarsson sem færir Vestmannaeyjabæ allt kortasafn sitt að gjöf.

Öll eru kortin upprunaleg og ótrúlega vönduð eintök. Greinilegt að Ólafur hefur lagt metnað sinn í að velja aðeins bestu fáanlegu eintökin af hverju korti.