Mikill fjöldi fólks var saman kominn á þjóðhátíð í gærkvöldi og nótt og talsverður erill hjá lögreglu fram undir morgun, segir í tilkynningu frá lögreglunni í Vestmannaeyjum.
Sjö líkamsárásarmál eru skráð hjá lögreglu eftir nóttina en í öllum tilfellum var um minniháttar líkamsáverka að ræða. Alls voru sjö vistaðir í fangageymslu, fjórir vegna ölvunarástands og þrír í tengslum við rannsókn líkamsárásarmála. Þá voru sjö minniháttar fíkniefnamál skráð síðasta sólarhringinn.
Þrátt fyrir þetta var rólegra hjá lögreglu en í Vestmannaeyjum öðrum umdæmum og hvergi meira að gera en á höfuðborgarsvæðinu að því er kemur fram í fréttum.
„Nú í morgunsárið er rólegt yfir bænum og sólin að gægjast í gegnum skýin. Lögregla vill beina því til ökumanna að gæta vel að því að aka ekki af stað fyrr en tryggt er að allt áfengi sé farið úr blóðinu. Lögreglan í Vestmannaeyjum verður með öflugt eftirlit með ástandi ökumanna á götum bæjarins í dag sem og aðra daga,“ segir í tilkynningunni.
Mótshaldarar áætla að um 15.000 gestir hafi verið í Herjólfsdal í gær. Í kvöld nær hátíðin hápunkti með frábærri dagskrá, Brekkusöng og blysunum sem verða 148 í ár.
Myndina tók Addi í London af þéttsetinni Brekkunni.
