Svandís Svavarsdótir, matvælaráðherra úthlutaði í dag rúmum 580 milljónum úr Matvælasjóði, en 58 verkefni um allt land fá styrk í ár.

Tvö verkefni í Eyjum,sem bæði tengjast Slippnum, fengu styrk sem hvor um sig nemur þremur milljónum. Styrkirnir eru veittir til að kanna fýsileika, greina eða útfæra hugmynd sem tengist íslenskri matvælaframleiðslu.

Styrkir vöruþróun
Við heyrðum í Gísla Matthíasi, og vorum fyrst til að færa honum fréttirnar af styrkveitingunum. Hann segir að styrkir sem þessir skipti gríðarlega miklu máli í vöruþróun eins og þau stundi hjá Slippnum, sem tekur oft langan tíma í framkvæmd.

Verkefnin sem fengu styrk eru: þorskroðssnakk og hægmeyrnun til fyrir aukin bragðgæði og áferð. Segir Gísli að ákveðin vöruþróun geti nú farið af stað sem muni ef til vill skila sér í neytendapakkningar, en ekki endilega á diskinn á veitingastaðnum.

MATEY framundan
Greinilega mikið af góðum hugmyndum þarna og ekki slæmt að fá slíka lyftistöng nú þegar tæpar þrjár vikur eru í Matarhátíð Vestmannaeyja, en hún verður haldin dagana 8.-10. september næstkomandi. Erlendir gestakokkar mæta á hátíðina og verður að því tilefni boðið upp á sérrétta matseðla á nokkrum veitingastöðum þessa helgi.

Ferðamálasamtök Vestmannaeyja og FabLab standa að hátíðinni ásamt veitingastöðum og fyritækjum í bænum.

Nánar verður fjallað um Matarhátíðina MATEY í Eyjafréttum sem koma út 7. sept.