Eyjafréttir eru bornar út til áskrifenda í dag í Eyjum og á fasta landinu. Þetta er 6. tölublaðið sem kemur út eftir að fjölgað var í starfsliði og stjórn sem stendur bakvið útgáfuna.
þetta 14. tölublað ársins er 20 síður í heildina og sneisafullt af efni. Ekki nóg með að blaðið í dag sé að koma út, heldur eru næstu tvö tölublöð þegar í farvatninu -Ekki ráð nema í tíma sé tekið.
Baki hverju tölblaði standa einstaklingar sem leggja fram óteljandi handtök og natni við hvert atriði blaðsins. Blaðið sem kemur út í dag ber þemað: Heilsa í Vestmannaeyjum og ég ætla að leyfa mér að vitna í fallegan texta í aðsendri grein Kára Bjarnasonar sem birtist í blaðinu, en það vill svo til að er ég 100 prósent sammála Kára og þessum orðum hans:
Við vitum ekki hvort og þá hver sé tilgangur okkar stuttu göngu; við vitum ekki hvort til sé endanlegur sannleikur eða aðeins brotasilfur mannlegrar umhugsunar; við vitum ekki hvort við erum heldur aðskildar einingar eða dropar sama hafs. Hitt vitum við hvað við getum gert til að verða besta útgáfa þessa hverfula, of oft ráðvillta lífs. Óendanlegt magn bóka, greina, fyrirlestra og annað er okkur á hverju andartaki aðgengileg sem segja öll sögu sama ævintýris. Dásamlegar samantektir hafa á undanförnum árum komið út um mikilvægi bætts mataræðis, svefns, hreyfingar o.s.frv. Í öllu þessu efni er sama spekin undirstaðan: Þú ert ákvörðunin!
Blaðið er alltaf aðgengilegt áskrifendum hér á vefnum, sjá valstiku, þar sem ávallt má finna nýjasta tölublaðið ásamt eldri tölublöðum.
Viljir þú gerast áskrifandi er nóg að smella hér og fylla út formið. Við munum þá tryggja að þú fáir næsta blað inn um lúguna hjá þér.
Lifið heil!
Eygló Egils
