Haustið er tími endurnýjaðs skipulags, þá tekur við ný dagskrá eftir sumarfrí, þó það megi deila um hvort sumarið hafi yfir höfuð heimsótt okkur þetta árið.

Í huga margra Vestmannaeyinga hefst haustið um leið og þjóðhátíðartjaldið er komið í geymslu, en hjá öðrum er það ekki fyrr en skóla- og íþróttastarf hefst af krafti og allir fjölskyldumeðlimir eru komnir í nýja rútínu.

Þriggja ára uppsöfnuð þörf
Það sem ekki síður fylgir haustinu er heilsuræktin, en fyrir marga er hún órjúfanlegur þáttur rútínunnar sem tekur gjarnan við á haustmánuðum. Í ár má segja að haustdagskrá heilsuræktarstöðva sé að hefjast af alvöru eftir þriggja ára lægð, og það má finna það á þjálfurum og eigendum heilsuræktarstöðvanna að eftirvæntingin og tilhlökkunin er mikil að fá að starfa án hindrana og takmarkana í vetur.

Eftirvænting meðal iðkenda er ekki síðri, þau sem blaðamaður hefur talað við, upplifa nú síður kvíða og hræðslu við að stíga inn fyrir þröskuld heilsusamlegasta húsnæðis landsins. Þriggja ára uppsöfnuð þörf fyrir heilsbót er til staðar hjá mörgum og þörfin er víða mikil. Því á meðan heimsfaraldur stóð hér yfir og almenningi var meinaður aðgangur að heilsuræktinni, jókst sala á gosdrykkjum og snakki um marga tugi prósenta. Ef áður var þörf fyrir hreyfingu og heilsurækt, þá er núna nauðsyn.

Ekki nóg að labba
Líkaminn okkar er hannaður fyrir hreyfingu, miklu meiri hreyfingu en flest okkar gera sér grein fyrir. Margir nota snjallúr og telja skrefin sín þar sem markmið dagsins eru 10 þúsund skref, en kannski væri nærri lagi að stefna að lágmarki á 10 þúsund skref.

Við búum yfir svo fjölbreyttri hreyfigetu í kroppnum okkar og eigum að hreyfa okkur í allar áttir; upp, niður, hægri, vinstri. Við þurfum líka að setja mismunandi álag á hann; þol-, styrktar- og kraftþjálfun er eitthvað sem þarf, til að viðhalda góðu heilbrigði.

Við ættum að tryggja okkkur fjölbreytta fæðu til að fylla á orkubirgðir líkamans, sérstaklega þegar við hreyfum okkur. Best er að fæðan sé sem allra hreinust og minnst unnin, þannig inniheldur fæðan fullt af orku og góða næringu.

Mestu skiptir þó að hafa gaman af því að rækta líkama og sál! Því ef það reynist ekki gaman að sinna heilsunni, er of auðvelt að hætta því. Og þar erum við í góðum málum hér í Vestmannaeyjum, því framboð á heilsurækt er með besta móti hvernig sem á það er litið; mikil fjölbreytni í þjálfun er til staðar og þjálfarar eru með ýmsan bakgrunn og sérhæfingu.

Við fullyrðum því með nokkurri vissu, að hér ættu allir að geta fundið heilsurækt við sitt hæfi. Gleðilega rútínu framundan!

Eygló Egilsdóttir – Ýtarleg úttekt á því sem er í boði í heilsurækt í Vestmannaeyjum.