Stjórn Herjólfs ohf. hefur undanfarið ár haft til skoðunar afsláttarkjör þau sem fyrirtækjum hefur staðið til boða af verðskrá vegna þjónustu ferjunnar Herjólfs. Þetta kemur fram í fundargerð félagsins frá því í október.

Herjólfur ohf. er markaðsráðandi fyrirtæki í þeim rekstri sem fyrirtækið er í enda eina ferjan sem siglir á milli Íslands og Vestmannaeyja í áætlunarsiglingum með farþega og farm.
Markaðsráðandi fyrirtækum eru ýmsar skorður settar með útfærslu og veitingu á afsláttum en skv. dómfordæmum má m.a. færa rök fyrir því að afslættir í formi tiltekinna markmiða, þ.e. markmiðsafslættir geta falið í sér misnotkun á markaðsráðandi stöðu í andstöðu við 11. gr. Samkeppnislaga og 54. gr. EES-samningsins en í þessu sambandi er m.a. vikið að afsláttum tengdum ársveltu fyrirtækja sem gætu fallið undir misnotkun á markaðsráðandi stöðu. Því má ráða að Herjólfi ohf. sem markaðsráðandi fyrirtæki eru veruleg takmörk sett varðandi veitingu afslátta án þess að slíkir afslættir séu almennir og án mikilla takmarkana.

Stjórn Herjólfs ohf. telur að almennir afslættir þjóni ekki markmiðum félagsins og þeirri
staðreynd að félagið er að hluta til rekið af opinberum fjármunum. Því tekur stjórn Herjólfs ohf. þá ákvörðun að frá og með áramótum 2022/2023 skuli allir afslættir af verðskrá falla niður hvort sem eru afslættir vegna farþega- eða farmflutninga.

Tekið er fram að skilmálar skv. samningi Vegagerðar og Herjólfs ohf. eru óbreyttir hvað varðar afsláttarkjör til íbúa Vestmannaeyja.