Austanrokinu síðustu daga hefur fylgt mikill mökkur af sandi og meiri en venjulega. Sjást þess merki í Vestmannaeyjum, á húsum, bílum og ekki síst rúðum húsa sem eru mattar af ryki og mold. Það er ekki nýtt að rykmökkur fylgi hörðum og þurrum austanáttum en sjaldan eins og núna. Sumir hafa bent á framkvæmdir á Nýja hrauni. Brynjar Ólafsson, framkvæmdarstjóri umhverfis- og framkvæmdasviðs bæjarins er sammála um að óvenju mikið mold- og sandfok hafi verið á verstu óveðursdögunum síðustu daga.

„Óvíst er að hvað miklu eða almennt einhverju leyti það kemur frá framkvæmdastaðnum uppi á hrauni. Ekki er hægt að koma í veg fyrir sand og moldfok á svona dögum. Þó má benda á að Þjótandi er mestmegnis að flytja grófara efni á hrauninu niður í fjöru,“ sagði Brynjar en flutningarnir tengjast framkvæmdum við fiskeldisstöðina sem senn rís í Viðlagafjöru.

Þá má benda á að mikill mökkur af fastalandinu eins og hefur legið yfir Eyjum síðustu daga er ekki nýtt í austan- og norðaustan áttum.

Mynd: Þessi vegstika hefur orðið fyrir barðinu á moldrokinu.