ÍBV tekur á móti Haukuk í Íþróttamiðstöðinni í Vestmannaeyjum klukkan 19:00 í kvöld þar sem sigurliðið mun lyfta Íslandsmeistaratitlinum í lok leiks. ÍBV vann fyrstu tvo leiki liðanna en Haukar hafa unnið síðustu tvo leiki í einvíginu eftir að Eyjamenn höfðu farið taplausir í gegnum bæði átta liða- og undanúrslitin gegn Stjörnunni og FH.

Miðasala gengur vel
“Miðasalan gengur frábærlega og er lengra komin en á sama tíma á föstudaginn,” sagði Vilmar Þór Bjarnason framkvæmdastjóri handknattleiksdeildar ÍBV. “Við vorum svo heppin að fá að halda stúkunum úr Þorlákshöfn og kunnum við þeim góðar þakkir fyrir það. Ég og mitt fólk erum búin að vinna hörðum höndum nánast frá því lokaflautið gall á Ásvöllum. Að undirbúa þetta allt til þess að koma þeim á leikinn sem vilja komast.”

Vilmar vildi koma því á framfæri til fólks að gengið verður inn norðan megin frá bílastæðunum inn í gamla salinn. Þar sem upphitun hefst klukkan 17:00. “Þar verða fastir liðir á boðstólnum. Borgarar og kaldir drykkir til sölu, hoppukastali fyrir börnin og Leó Snær tekur lagið. Það er mikil eftirvænting hjá liðinu og okkur sem að þessu stöndum og við treystum á okkar fólk að landa þeim stóra,” sagði Vilmar Þór á sínum síðasta formlega degi í starfi fyrir ÍBV.