Anton Örn og RóbertNýr veitingastaður í Vöruhúsinu

::Ætla að bjóða léttan og góðan mat á sanngjörnu verði 
::Þakklát fyrir jákvæð viðbrögð 

Nýr veitingarstaður verður opnaður að Skólavegi 1 þegar líður að sumri. Þeir Anton Örn Eggertsson og Róbert Agnarsson standa á bakvið staðinn ásamt fjölskyldu sinni. Eyjafólk sem fylgst hefur með framkvæmdum hefur velt fyrir sér um hverskonar stað verði að ræða. Til að svara þeirri spurningu tókum við því púlsinn á Antoni Erni um stöðu framkvæmda og hvað veitingarstaðurinn muni bjóða upp á. 

Anton Örn, Hildur Rún, Helga Dögg og Hinrik Eddi.


Róbert og Sigrún Ósk ásamt barnabörnum. Hinrik Eddi og Helga Dögg í fangi. Í fremri röð eru þær Camila Mora Tabares og Sophia Mora Tabares.

Anton er fæddur og uppalinn í Vestmannaeyjum. Hann er trúlofaður Hildi Rún Róbertsdóttur og saman eiga þau tvö börn, Helgu Dögg og Hinrik Edda. Róbert Agnarsson er tengdafaðir Antons og saman standa þeir á bakvið veitingarstaðinn. Róbert er giftur Sigrúnu Ósk Ómarsdóttur og saman eiga þau þrjár uppkomnar dætur. „Það er ekkert smá verk að opna og reka svona stað og erum við mjög heppnir að við eigum mjög marga góða að til þess að aðstoða okkur“ segir Anton. 

 Í bransanum í 15 ár 

Anton hefur mikla reynslu af veitingariðnaðinum og hefur starfað við hann í að verða 15 ár. „Ég byrjaði hjá Helgu og Arnóri bakara, flutti svo til Reykjavíkur 18 ára og vann þar næstu árin á ýmsum veitingastöðum ásamt því að vera með veislur og vinna á bakvið tjöldin í upptökum á matreiðsluþáttum hans Eyþórs Rúnarssonar á Stöð 2. Árið 2016 flytjum við Hildur út til Spánar og vann ég þar sem yfirkokkur á veitingarstað þar til við flytjum heim til Eyja. Þá byrja ég á GOTT og fæ einn besta skólann í veitingabransanum frá Sigga og Berglindi og síðan opnum við saman Pítsugerðina fljótlega eftir það.“ 

Tími til að standa á eigin fótum 

Fyrir sitt leyti segir Anton að honum hafi fundist vera tími til kominn að standa á eigin fótum og vantaði nýja áskorun í starfi. „Okkur bauðst þetta húsnæði og það heillaði mikið þrátt fyrir gríðarlega miklar framkvæmdir sem við erum í núna.“
Mikil vinna hefur farið í að koma staðnum í stand og segir Anton að búið sé að taka allt eldhússvæðið í gegn, alla fleti í rýminu til dæmis veggi, loft og gólf sem er heljarinnar verk. „Gísli Ingi og hans menn eru búnir að vera aðstoða okkur með það. Í veitingasalnum liggur aðeins minni vinna, þar eru heilir veggir og loft og þurfum við bara koma gólfefni á, taka salernin í gegn, smíða bar og bekki, ekkert svo mikið.“ 

Staðsett í sögufrægu húsi 

Staðurinn er í mjög merkilegu og sögufrægu húsi og mun staðurinn heita Vöruhúsið eins og húsið hefur oftast verið kallað í gegnum tíðina. 

Stefnan er að því að vera mjög fjölbreyttur staður. „Við verðum með léttan og góðan hádegisseðil sem er tilvalið að grípa með sér eða borða á staðnum. Síðan með haustinu munum við bjóða upp á hádegishlaðborð, kaffi og kökur með því. Á kvöldin verður stærri matseðill í boði og er markmiðið að allir geti fundið sér eitthvað við hæfi, hvort sem það eru hamborgarar, pítsur, pastaréttir eða aðrir réttir. Við verðum svo auðvitað með ljúffenga barnarétti.“ 

Anton segir nokkrar ástæður fyrir því að þau völdu að fara þessa leið. „Við teljum að það sé klárlega eftirspurn fyrir þessum mat hér í Eyjum og við vildum opna stað þar sem við getum boðið upp á góðan mat á sanngjörnu verði.“ Þegar kemur að þjónustu er stefna þeirra að bjóða upp á létta og persónulega þjónustu við viðskiptavini. 

Stefna á opnun fyrir sumar 

Stefna þeirra er að opna fyrir sumarið en vonandi fyrr ef allt gengur upp. Að lokum vilja þau þakka kærlega fyrir viðbrögð Vestmannaeyinga fyrir staðnum. „Það er gaman að heyra spennuna og jákvæðnina í öllum. Síðan vil ég þakka peyjunum í Miðstöðinni kærlega fyrir alveg framúrskarandi þjónustu, þeir eru búnir að þola mjög margar skrítnar fyrirspurnir frá okkur og þeir eyða tímunum saman að finna svör og alltaf gert með brosi á vör, alvöru þjónusta þar á ferð“. 

Myndir frá framkvæmdum