Útgerðarfyrirtæki í Vestmannaeyjum greiddu á síðasta fiskveiðiári, sem lauk 1. september síðastliðinn, vel yfir einn milljarð króna í veiðigjöld sem var nærri tvöföldun frá árinu á undan. Það er íþyngjandi og treysta verður að ríkisstjórn og Alþingi standi við gefin fyrirheit um lækkun þessara gjalda, segir Íris Róbertsdóttir, bæjarstjóri í Eyjum í umfjöllun um mál þetta í Morgunblaðinu í dag.
Bent er á að viðsjár hafi verið á síðustu misserum í sjávarútveginum vegna sterks gengis íslensku krónunnar. Lægra verð en oft áður hafi fengist fyrir afurðirnar. Svo bætist veiðigjöldin við og þau séu íþyngjandi.
„Þessir peningar væru betur komnir hér í Eyjum, þar sem þeir urðu til, en í ríkishítinni. Þennan landsbyggðarskatt verður að lækka,“ segir Íris sem telur mikilvægt að heimamenn séu jafnan í ráðandi stöðu þegar stjórnvöld taka ákvarðanir um þeirra mál. Því sé til verulegra bóta að þegar nýr Herjólfur kemur á næstu misserum muni Eyjamenn sjálfir geta haft hönd í bagga með til dæmis tíðni ferða og gjaldskrá ferjunnar. Það sé mikilvægt hagsmunamál fyrir byggðina, rétt eins og heilbrigðisþjónustan. Starfsemi á sjúkrahúsinu í Eyjum hafi verið skert mikið á síðustu árum og margvísleg starfsemi þar lögð af. Því vill bæjarstjórinn að verði snúið til baka.
Morgunblaðið greindi frá.
