Umhverfis- og samgöngunefnd Alþingis kemur saman í fyrramálið, klukkan 8:30, til þess að ræða stöðu innanlandsflugs á Íslandi en Vilhjálmur Árnason, nefndarmaður Sjálfstæðisflokksins í umhverfis- og samgöngunefnd Alþingis, óskaði á dögunum eftir því að fundurinn yrði haldinn.
Gestakomur verða frá fulltrúum flugrekstraraðila og ISAVIA en Vilhjálmur óskaði eftir fundinum í kjölfar þess að flugrekstraraðilar drógu saman seglin í áætlunarflugi innanlands og lýstu yfir erfiðleikum í rekstri.
Vilhjálmur segir brýnt að samgönguáætlun komi til framkvæmda sem fyrst, en þar munar helst um skosku leiðina í innanlandsflugi.

Vilhjálmur sagði í samtali við Eyjafréttir brýnt að samgönguáætlun komi til framkvæmda sem fyrst, en þar munar helst um skosku leiðina í innanlandsflugi.
“Ég vonast til að varpa betra ljósi á stöðu innanlandsflugsins og hvort það séu færar leiðir til að bregðast fljótt og ákveðið við stöðunni og tryggja flugið í sessi og efla það enn frekar. Það mun skipta miklu upp á að hafa öflugar samgöngur til Vestmannaeyja að hafa fleiri en einn valmöguleika á að ferðast til og frá Eyjum með góðri tíðni ferða. Þetta skiptir Vestmannaeyjar miklu máli samgöngulega séð að það takist að efla innanlandsflugið.”