Á fundi í bæjarstjórn síðasta fimmtudag lá fyrir til umræðu og staðfestingar skipulag tjaldsvæða á þjóðhátíð en Eyjafréttir hafa áður fjallað um málið. Meirihluti bæjarstjórnar er hlynntur því að skoða að framtíðar tjaldsvæði fyrir Þjóðhátíð verði á Þórsvelli. Tekið verði upp samtal við ÍBV íþróttafélag um málið og gerð verði tilraun með tjöldun á vellinum í sumar. Meirihluti bæjarstjórnar tekur undir með umhverfis- og skipulagsráði og telur mikilvægt að ekkert verði aðhafst fyrr en eftir að stóru fótboltamótin eru yfirstaðin sumarið 2020. Lagt er til að ástand á Þórsvelli verði metið eftir Þjóðhátíð 2020. Að mati loknu verður tekin ákvörðun um framhaldið í samvinnu við ÍBV Íþróttafélag, þar sem skoða verður hvort hægt verði að hafa tjaldstæðin á vellinum og nýta völlinn áfram.
Bera vott um úræðaleysi
Í bókun frá bæjarfulltrúum D-lista segir. „Bæjarfulltrúar Sjálfstæðisflokksins telja það bera vott um úrræðaleysi og virðingarleysi meirihluta H- og E-lista gagnvart fjármunum sveitarfélagsins að þar sem þörf er á nýju tjaldsvæði í um 7 daga á ári yfir þjóðhátíð sé það virkilega tillaga meirihluta nefndarinnar að sveitarfélagið þurfi að ráðast í að fjölga knattspyrnuvöllum. Sé það einskær vilji meirihlutans að fjölga knattspyrnuvöllum í sveitarfélaginu ættu kjörnir fulltrúar að hafa kjark í að slá því föstu fram en ekki nota það sem átyllu vegna skorts á landsvæði undir tjöldun á þjóðhátíð.“
Bókun frá Hildi Sólveigi Sigurðardóttur og Eyþóri Harðarsyni segir en fremur. „Undirrituð telja eðlilegt að láta reyna á tjöldun á Þórsvelli yfir verslunarmannahelgi ef Áshamarsreiturinn verður ekki lengur valmöguleiki vegna framkvæmda. Með öflugu skipulagi og vandlegri hreinsun á vellinum að þjóðhátíð lokinni ætti völlurinn að ná sér fljótt aftur til knattspyrnuiðkunar. Skipuleggjendur hátíðarinnar, sem er ÍBV Íþróttafélag, geta ekki frekar en aðrir bæjarbúar skorast undan því að sýna ábyrgð og þolinmæði gagnvart gríðarlegum fjölda gesta á umræddri helgi og gera allt til að leysa tjaldmál hátíðarinnar á sem bestan og hagkvæmastan hátt fyrir bæjarbúa.“
Ekki að leggja til að byggja nýjan grasvöll
Meirihlutinn svaraði með bókun. „Það er mikill misskilningur að meirihluti sé að leggja til að byggja nýjan grasvöll vegna sjö daga tjöldun. Enda er vinna, umræða og samtal allt eftir. Um er að ræða að gera tilraun með tjöldun á Þórsvellinum. Mikilvægt er að vinna þetta mál í sátt og samlyndi við alla hagsmunaaðila.“
Vilja skýrari fundargerðir
Í umræddri fundargerð hópsins stendur “Ef nýta á þórsvöllinn þarf augljóslega að bæta við knattspyrnuvelli”. Það væri þá gott ef að niðurstöður fundargerðir væru skýrari ef þetta er ekki vilji meirihluta.
Samþykkt 4-3
Skipulag tjaldsvæða á þjóðhátíð var samþykktur með fjórum atkvæðum H- og E-lista gegn þremur atkvæðum D-lista. Trausti Hjaltason gerði grein fyrir atkvæði sínu með eftirfarandi bókun. Ég tel óboðlegt að leyfa tjöldun á Þórsvellinum og leggst því gegn slíkum hugmyndum.
Óboðlegt að leggja til óbreytt ófremdarástand
Njáll Ragnarsson gerði grein fyrir atkvæði sínu með eftirfarandi bókun. Það er ákaflega sérstakt að sjálfstæðismenn leggja það til að áfram verði tjaldað á Áshamarssvæðinu þrátt fyrir gríðarlega óánægju íbúa í hverfinu við tjöldun á því svæði. Eftir allt sem á undan er gengið er óboðlegt að leggja til það óbreytta ófremdarástand.
