Í ár fögnum við því að 45 ár eru liðin frá Heimaeyjargosinu 1973 og að á þessum árum hefur vel tekist til að byggja hér upp blómlegt samfélag á ný. Fyrir liggur dagskrá Goslokahátíðar 2018 og eru kjörorð nefndarinnar mannamót, samvera og vinafundir. Goslokanefnd hefur lagt áherslu á að gera bæjarbrag hátíðarinnar sem mestan og sem lið í því átaki vill nefndin hvetja alla bæjarbúa og fyrirtæki til þess að skreyta umhverfi sitt í goslitunum. Bendum við einnig á að útivistarreglur eru í gildi þrátt fyrir Goslokahátíð og að börn eru ætíð á ábyrgð foreldra sinna. Viljum við þakka öllum þeim sem koma að viðburðarhaldi kærlega fyrir samstarfið og minnum við á að hátíð sem þessi væri ekkert án aðstoðar einstaklinga og fyrirtækja. Þá er það von okkar að allir finni eitthvað við sitt hæfi í fjölbreyttri dagskrá og skemmti sér fallega saman. Góða skemmtun.