„Grunnurinn að fágætissafninu er gjöf Ágústar Einarssonar sem hann gaf í minningu föður síns, Einars Sigurðssonar ríka. Það eru um 1500 bækur sem eru fágætar og í hópi mestu perla í íslenskri bókmenningarsögu,“ segir Kári Bjarnason, forstöðumaður Safnahúss sem hýsir fágætissafnið.

„Þar er að finna allar Biblíurnar sem gefnar hafa verið út á Íslands. Allt frá Guðbrandsbiblíu frá 1584, Þorláksbiblíu frá 1644 og Steinsbiblíu frá 1728, þ.e. allar ellefu útgáfurnar. Elsta bókin í safninu er svokallað vögguprent sem kom út 1498. Er keppikefli allra bókasafna að eignast vögguprent því fáar bækur voru gefnar út fyrir árið 1500.“

Kári segir að í safninu séu mikill fjölda bóka í íslenskum grunnfræðum. „Bækur í íslenskum fræðum frá sautjándu, átjándu og nítjándu öld. Grundvallarrit íslenskrar menningar, skálda og aðrar grundvallar bækur. Auk þess er að finna í safninu um 40 málverk eftir Kjarval sem ekki hafa verið gerð aðgengileg fyrr en núna.

Kjarvalssafnið er upphaflega komið frá Sigfúsi M. Johnsen. Svokallaðar átthagabækur sem fjalla um Vestmannaeyjar eiga einnig sinn stað í safninu. Eru það um 2000 bækur auk málverka eftir Júlíönu Sveinsdóttur. Þá erum við með Íslandskort, mikið og stórt safn frá Ólafi Hjálmarssyni. Af þeim sýnum við  þrjú kort frá 1570. Það munu flestir kannast við þessi Íslandskort en hér erum við með frumkortin sjálf.“

Hönnun Fágætissafnsins er á allan hátt vel heppnuð og strax og komið er inn finna gestir að komið er inn á safn sem segir merka sögu.

Má óska okkur til hamingju

Kári segir að vissulega megi óska Vestmannaeyingum til hamingju með fágætissafnið. „Það er í hópi mestu fágætissafna landsins og hvað varðar verk Kjarvals og Júlíönu hefur Ágúst verið að safna öllum bókum um Kjarval og eftir Kjarval. Hann skrifaði yfir 20 bækur og þær er allar að finna á safninu, margar með persónulegum áletrunum frá honum sjálfum. Það er því einstök upplifun fyrir gesti að koma í safnið. Vil ég hvetja alla til að mæta kl. 13.30 á sunnudaginn og taka þátt í hátíðardagskrá þar sem menningarmálaráðherra, kirkjumálaráðherra og biskup Íslands opna salinn formlega. Þá flytja erindi Ágúst Einarsson, Örn Hrafnkelsson landsbókavörður ásamt biskupi, frú  Guðrúnu Karls Helgudóttur,“ segir Kári.