Hvert er hlutverk bæjarfulltrúans ?
eftir Eyþór Harðarson
eythor_h_cr
Eyþór Harðarson

„Hvenær drepur maður mann og hvenær drepur maður ekki mann?“ spurði Jón Hreggviðsson í  Íslandsklukku, frægri skáldsögu Halldórs Laxness. Þessi stórkostlega spurning kemur stundum upp í huga minn þegar sveitarstjórnarmálin í Eyjum eru rædd. Ég spyr sjálfan mig: Hvenær er maður í minnihluta og hvenær ekki?

Svarið er ekki alltaf augljóst, en eitt er víst: minnihlutastaða í bæjarstjórn snýst ekki um að horfa aðgerðalaus á, heldur um að axla ábyrgð og hafa áhrif á samfélagið.

Sterkt umboð frá bæjarbúum

Í síðustu bæjarstjórnarkosningum hlaut Sjálfstæðisflokkurinn rúmlega 44 % atkvæða, sem gerir hann að stærsta stjórnmálaflokki bæjarins. Þótt við höfum ekki náð hreinum meirihluta, höfum við sterkt umboð frá tæplega helmingi bæjarbúa. Þessari  niðurstöðu fylgir mikil ábyrgð sem við í minnihlutanum tökum alvarlega.

Við lögðum metnað í kosningabaráttuna og settum fram skýran verkefnalista sem við trúum að muni bæta samfélagið okkar. Þrátt fyrir að vera í minnihluta höfum við unnið að þessum verkefnum með hag bæjarfélagsins að leiðarljósi. Fyrir okkur snýst þetta ekki um pólitísk karp eða átök, heldur um að ná raunverulegum árangri fyrir Vestmannaeyjar.

Samvinna er lykillinn að árangri

Nokkrir hafa bent á að við  bæjarfulltrúar  Sjálfstæðisflokksins vinni of mikið með meirihluta H- og V- lista. Sumir telja að það grafi undan okkur sjálfum í næstu kosningum. Ég er ósammála. Í bæjarstjórn, sérstaklega í samfélagi af okkar stærðargráðu, er nauðsynlegt að setja pólitíska hagsmuni til hliðar og vinna saman í lykilmálum – hvort sem það eru samskipti við ríkisvaldið eða stórar ákvarðanir um innanbæjarmál.

Það væri ekkert betra fyrir samfélagið okkar ef bæjarráð væri ósamstíga í baráttumálum gegn ríkinu. Þvert á móti myndi það veikja stöðu okkar og draga úr þeim árangri sem við getum náð fyrir Eyjamenn.

Heiðarleiki og traust til framtíðar

Ég trúi því að flestir kjósendur Sjálfstæðisflokksins vilji sjá bæjarfulltrúa sína vinna af heilindum og einlægni fyrir samfélagið, sama hvort þeir séu í meirihluta eða minnihluta. Með því að halda áfram að leggja áherslu á samvinnu, traust og lausnir getum við ekki aðeins bætt samfélagið okkar heldur líka styrkt stöðu flokksins til framtíðar.

Í mínum huga snýst þetta um eitt: Að setja hag Eyjamanna í fyrsta sæti og vinna að því af heiðarleika og heilindum.

 

Eyþór Harðarson, bæjarfulltrúi.

Nýjustu fréttir

Fréttir
Innviðaráðherra svarar bæjarráði
Stjórnmál
Spurt og svarað: Jón Þór frá Miðflokknum
Skipulagsmál
Hafnað um stækkun ramps
Íþróttir
Fyrirliði ÍBV spennt fyrir komandi tímabili í Bestu deildinni
Íþróttir
Þungt tap ÍBV gegn KR
Myndband
Stelpurnar klárar í slaginn
Menning
Jóna Heiða með sýningu í Sagnheimum
Fréttir
Eldsneytisvandi í Eyjum ratar á Alþingi
Mest lesið

Góð ráð fyrir siglingu

Sjóveiki

Hvað er sjóveiki?

Sjóveiki er misræmi milli skynfæra líkamans sem senda boð til heilans um hreyfingu – kyrrstöðu.

Þegar einstaklingur er úti á sjó þá nema skynjarar í vökvafylltum gangi í innra eyra hreyfingu og senda boð til heilans að einstaklingur sé á hreyfingu. Augun senda hins vegar boð til heilans um að viðkomandi sé kyrr. Heilinn á erfitt með að vinna úr þessum misvísandi og ósamræmdu upplýsingum og sendir skilaboð til magans um að tæma sig – þ.e. veldur uppköstum.

Einkenni sjóveiki eru þreyta, ógleði, svimi, svitakóf og uppköst.

Góð ráð til að hindra sjóveiki:

  • Góð hvíld daginn fyrir brottför. Að fara seint að sofa og snemma um borð í bát fer ekki vel saman ef fólk er hætt við sjóveiki.
  • Forðist áfenga drykki daginn fyrir brottför
  • Forðist djúpsteiktan, brasaðan eða saltan mat daginn fyrir siglingu.
  • Borðið góðan morgunverð. Borðið gjarnan hvítt brauð, hafragraut og ávexti þó ekki sítrus ávexti.
  • Forðist mikið koffein. Mikið kaffi er ekki það sem maganum líkar fyrir sjóferð.
  • Hafðu mat með þér á sjó. Gott er að hafa samlokur með kjúklingi eða kalkún. Kjötið er fitusnautt og brauðið er róandi í maga. Hafðu endilega eitthvað til að grípa í sem er létt í maga. Bananar eru mjög góðir til að narta í ef þú finnur fyrir ógleði en einnig er gott að hafa létt kex eða annað sem er ekki salt eða fitumikið.
  • Drekkið vel af vatni en einnig er gott er að drekka kóla drykki eða engiferöl í sjóferðinni

Lyf við sjóveiki þ.e. lyf sem slá á einkennin og fást án lyfseðils í apóteki.

  • Koffínátín – fæst án lyfseðils
  • Postafen – fæst án lyfseðils
  • Scopolamin plástur – lyfseðilsskyltEinnig má fá armbönd gegn ferðaveiki sem sumir telja að hjálpi.

Önnur ráð:

  • Engifer er jurt sem nýlega hefur fengið aukna athygli vegna þess að því er haldið fram að hún geti slegið á ógleði sem fylgir sjóveiki. Til forna tuggðu kínverskir sjómenn engiferrót til að draga úr sjóveiki. Flest lyf sem virka á ógleði verka á heilann en engifer virkar aðeins á magann. Ráðlagt er að taka 1000 mg. hylki hálftíma fyrir brottför. Einnig má taka eitt eða tvö 500 mg. hylki sem eru til viðbótar á ferðalaginu. Ekki er ráðlagt að drekka coke með engifertöflum.
  • Piparminta og te eru einnig gömul húsráð við ferðaveiki.
  • Sumum finnst betra að taka sýrujafnandi töflur, Alminox eða slíkt áður en þú heldur á sjó og þá er gott að hafa box með út á sjó.

Hvar í skipinu er best að vera o.fl.

  • Minna finnst fyrir hreyfingu og veltingi ef maður er staddur næst miðju bátsins.
  • Mörgum finnst gott að vera í kulda, t.d.að vera úti á dekki og láta vindinn leika um sig.
  • Matarlykt fer illa í þá sem hætt er við sjóveiki og einnig pústið frá bátnum.

Þungun:

Þungaðar konur sem þjást af sjóveiki mega nota koffinátín í litlum skömmtum en best er að ráðfæra sig við lækni eða lyfjafræðing.
Þunguðum konum er ekki ráðlagt að nota engifer þar sem það er ekki staðfest hvort það geti haft skaðleg áhrif á fóstur.

Eyjafréttir
Keyrt af  GDPR Cookie Compliance
Friðhelgisyfirlýsing

Þessi vefsíða notar fótspor til að við getum veitt þér bestu notendaupplifun. Upplýsingar um fótspor eru geymdar í vafranum þínum og framkvæma aðgerðir eins og að þekkja þig þegar þú kemur aftur á vefsíðu okkar og hjálpa teymi okkar að skilja hvaða hluta vefsíðunnar þér finnst áhugaverðast og gagnlegast.