Húsnæðis og mannvirkja stofnun kynnti fasteignamat ársins 2024 á fundi miðvikudaginn 31. maí síðastliðinn.

Fram kemur á vísir.is að á fundinum var farið yfir verðþróun á markaði, framboð og húsnæðisþörf. Í kynningunni kom fram að fasteignamati er ætlað að gefa mynd af markaðsvirði fasteigna. Því er ætlað að endurspegla breytingar á verðþróun síðasta árs og hækkar verðmat íbúðarhúsnæðis að meðaltali um 13,7% á landinu. Hækkanir eru heldur meiri á landsbyggðinni en þar hægði seinna á hækkun á markaðsverði en á höfuðborgarsvæðinu. Af öðrum stærri bæjum á landsbyggðinni má nefna að fasteignamat íbúða hækkar um 22,2 prósent í Vestmannaeyjum, 22 í Grindavík, 20,8 í Fjarðabyggð, 19,2 í Borgarbyggð, 17,5 í Reykjanesbæ, 17 á Akranesi, 16,7 í Skagafirði, 16,6 á Akureyri, 16,3 á Ísafirði, 9 í Árborg, 8,5 í Hveragerði og 3,3 á Stykkishólmi. Fasteignamat atvinnuhúsnæðis hækkar ívið minna, en gera má ráð fyrir að hækkandi vextir hafi haft meiri áhrif á verð þess, jafnframt því sem uppbygging hefur verið betur í samræmi við þörf.

Helstu niðurstöður fundarins:

• Fasteignamat hækkar um 11,7%.
• Heildarmat fasteigna á Íslandi hækkar um 11,7% frá núverandi mati og verður 14,4 billjónir króna, samkvæmt fasteignamati HMS fyrir árið 2024.
• Fasteignamat íbúða hækkar um 13,7% á milli ára og verður alls 10,6 billjónir króna, þar af hækkar sérbýli um 14,3% á meðan fjölbýli hækkar um 13,1%.
• Fasteignamat íbúða á höfuðborgarsvæðinu hækkar um 13% á meðan hækkunin er 16,1% á landsbyggðinni.
• Fasteignamat íbúða hækkar mest í Skagabyggð en þar hækkar íbúðarmatið um 43,9%, í Reykhólahrepp um 43,5% og í Vesturbyggð um 33,6%. Breyting á íbúðamati er neikvæð í Grundarfjarðarbæ þar sem fasteignamat íbúða lækkar um 0,9%, en minnst hækkun er í Stykkishólmi þar sem hækkunin er 3,3%.
• Fasteignamat atvinnuhúsnæðis hækkar um 4,8% á landinu öllu; um 4,5% á höfuðborgarsvæðinu en um 5,4% á landsbyggðinni.
• Fasteignamat sumarhúsa hækkar um 12,7% á landinu öllu.

Lesa má nánar um fundinn hér.