Bjarni Jónasson hefur víða komið við á lífsleiðinni, sótti sjóinn sem háseti, kokkur, vélstjóri og stýrimaður, rak flugfélag, útvarpsstöð, fór fyrir framboðslista í bæjarstjórnarkosningum og kenndi í mörg ár svo það helsta sé nefnt. Hann er borinn og barnfæddur Eyjamaður, kominn á níræðisaldur og nú bætir hann enn einni rósinni í hnappagatið. Er að gefa út bók þar sem ævin er rakin í máli og myndum. Bókina kallar hann, Að duga eða drepast. Bókin verður kynnt í Einarsstofu á sunnudaginn, 1. september kl. 13.00. Bókin er hin glæsilegasta og mikið af myndum sem gefa henni aukið gildi.

„Það voru snillingar sem gerðu þetta,“ segir Bjarni hógvær. „En það var ekkert til sparað,“ sem eru orð að sönnu því bókin er í stóru broti þannig að texti og myndir njóta sín vel. „Kveikjan að bókinni? Ég er búinn að ganga með þetta í maganum lengi en treysti mér ekki í það. Það var tengdadóttir mín sem ýtti á mig og á endanum lét ég til leiðast. Í allt tók þetta tvö ár. Ég er með knappan texta en það hafa miklir snillingar verið að kippa í spottann en á endanum var þetta mitt. Margir ævisöguritarar eru með of langan texta og segja meira frá sjálfum sér en atburðum. Það hentaði mér ekki,“ segir Bjarni.

„Þetta er það sem ég hef verið að gera um dagana,“ segir Bjarni um innihald bókarinnar. „Ég var í öflugum vinahópi með Gísla Sigmarssyni, Gústa Hregg og Svenna á Hvanneyri. Kjarninn í hópnum vorum við Gísli sem er eins og ég fæddur í október 1937. Við byrjuðum ungir að búa og byggja hús. Ég kynntist Jórunni (Bergsdóttur) minni þegar hún kom hingað á vertíð með systur sinni. Hún 18 ára og ég 16 ára og þarna varð ég ljúga til um aldur upp á við,“ segir Bjarni og hlær. Það skaðaði ekki því sambandi hélst.

Bjarni og Jórunn búa að Brekkugötu 1, húsi sem þau byggðu en ekki verður sagt að mikill þvælingur hafi verið á Bjarna. „Ég fæddist og ólst upp á Boðaslóð 5 þar sem við byrjuðum að búa. Síðar fluttum við á Brekkugötuna og er það í eina skiptið sem ég hef skipt um lögheimili,“ segir Bjarni.

Byrjaði snemma að strita
Eins og títt var um ungt fólk á Íslandi á þessum árum byrjaði Bjarni ungur að vinna. „Ég byrjaði 11 ára í frystihúsi sem seinna varð Vinnslustöðin. Sextán ára var ég kominn á sjó á Ísleifi VE 63 sem þá var eldgamall. Ég var á mörgum bátum sem þótti ekki til fyrirmyndar. Ástæðan var að ég var kokkur. Fór seinna í Vélskólann og svo Stýrimannaskólann og vildi láta reyna á þessa menntun mína. Seinna átti ég eftir að kenna veðurfræði við Stýrimannaskólann og var þar í 18 ár.“

Flugfélag og útvarpsstöð
Bjarni kom víðar við og á árunum milli 1950 og 1960, þá á Skaftfellingi VE var Bjarni að skjótast út á flugvöll í Reykjavík og taka einn og einn flugtíma. „Það liðu svo mörg ár áður en ég fór að fljúga fyrir alvöru. Það var eftir 1960 og með flugpróf upp á vasann keypti ég mér mína fyrstu flugvél í júní 1969. Næst var það fjögurra sæta flugvél og svo koll af kolli og loks keypti ég tíu manna Islander flugvél,“ segir Bjarni sem stofnaði Eyjaflug sem hann rak í nokkur ár.

Næst varð hann framkvæmdastjóri Kertaverksmiðjunnar Heimaeyjar. „Þar var ég í fjögur ár, upp á dag. Byrjaði í febrúar 1984 og hætti í sama mánuði 1988,“ segir Bjarni og ekki má gleyma Útvarpi Vestmannaeyjar.

„Það byrjaði 1993, á Goslokahátíð að ég fór fyrst í loftið,“ segir Bjarni sem stundum tókst að hrista upp í bæjarsálinni. „Útvarpið lifði í meira en aldarfjórðung. Það var á þessu ári sem ég hætti að nenna að standa í þessu.“

Loks er það pólitíkin. „Ég fór fram með óháð framboð 1986 og var að sjálfsögðu í efsta sæti. Sem betur fer fékk fá atkvæði,“ segir Bjarni kíminn. „Það kusu mig færri en skrifuðu upp á listann.“ Og nú hlær Bjarni innilega.

Eins og þessi upptalning ber með sér hefur Bjarni ekki alltaf farið troðnar slóðir og ekki hefur lífið leikið við þau Jórunni. Alls eignuðust þau fimm börn en misstu tvo syni. Frá þessu segir Bjarni frá í bókinni.

Eins og að framan greinir verður bókin kynnt og til sölu í Einarsstofu á sunnudaginn og verður fróðlegt að sjá og heyra Bjarna segja frá bókinni og valda vini lesa stutta kafla. Allir eru velkomnir.

Þau sem unnu að bókinni með Bjarna eru Óskar Ólafsson sem braut um, Gunnþóra Gunnarsdóttir, blaðamaður á Fréttablaðinu og Bergþór Bjarnason, íslenskufræðingur ráðgjafar og prófarkalesarar. Svavar Sigurjónsson sá um gamlar myndir sem sumar eru meira en 100 ára.