Í sundlaug Vestmannaeyja standa nú yfir umfangsmiklar framkvæmdir þar sem verið er að endurnýja búnað sem hefur verið í notkun frá upphafi. Markmið framkvæmdanna er að bæta vatnsgæði og auka öryggi gesta. Í því samhengi er verið að setja upp fimm nýjar sandsíur sem munu gegna lykilhlutverki í hreinsun sundlaugarvatnsins.

Pípulagningarmenn vinna þessa dagana að því að tengja lagnir að og frá síunum, á meðan rafvirkjar annast uppsetningu á nýrri stjórntöflu sem stýrir starfsemi búnaðarins. Til að koma síunum fyrir þurfti að saga op í gólfið sunnan megin við laugina og þar verður framvegis þjónustulúga sem einfaldar aðgengi að búnaði og viðhaldi.

Samhliða þessu hafa allar frárennslisrennur í sundlauginni verið yfirfarnar og lagfærðar, auk þess sem þær hafa verið þéttaðar betur til að tryggja aukna vatnsheldni og lengri endingartíma. Þá hefur jöfnunartankurinn einnig verið tekinn í gegn og styrktur en hann gegnir lykilhlutverki í að viðhalda réttu vatnsmagni í lauginni.

Samkvæmt núverandi áætlun er gert ráð fyrir að framkvæmdunum ljúki um miðjan febrúar.

Tilkynning birtist í dag á vestmannaeyjar.is