Díana Óskarsdóttir, forstjóri Heilbrigðisstofnunar Suðurlands, hefur skipað nýtt sjö manna fagráð til næstu þriggja ára.

Fram kemur á heimasíðu stofnunarinnar að hlutverk fagráðsins sé að vera ráðgefandi vettvangur um faglega þróun og gæði þjónustu innan HSU. Ráðið skal stuðla að framþróun og faglegri umræðu þvert á starfsemi stofnunarinnar, með hag sjúklinga og samfélagsins að leiðarljósi.

Í fagráðinu sitja Andri Jón Heide, yfirlæknir á bráðamóttöku HSU, Aníta Ársælsdóttir, hjúkrunarfræðingur á heilsugæslunni í Vestmannaeyjum, Anna Margrét Magnúsdóttir, hjúkrunarfræðingur og aðstoðardeildarstjóri á heilsugæslunni á Selfossi, Björn Jakob Magnússon, læknir á heilsugæslunni á Selfossi, Lóa Björk Óskarsdóttir, yfirlífeindafræðingur, Sverrir Örn Jónsson, sjúkraflutningamaður og Þórhildur Hjaltadóttir, hjúkrunarfræðingur og flæðisstjóri.

Við skipun fagráðsins var lögð áhersla á fjölbreytta þekkingu, reynslu og sjónarhorn úr ólíkum faggreinum innan heilbrigðisþjónustunnar. Markmiðið er að styrkja faglegt samtal, styðja við markvissa ákvörðunartöku og efla gæði þjónustu HSU til framtíðar.