Það sýndi sig enn og aftur í dag að það er ekki alltaf nóg að vera betri í fótbolta til að vinna leiki. ÍBV tók á móti nýkrýndum Íslandsmeisturum FH og voru mun sterkari, sérstaklega fyrstu 75 mínúturnar. Eyjamenn komust í 2:0 áður en FH-ingar nýttu sér kæruleysi varnarmanna ÍBV og skoruðu klaufalegt mark. Jöfnunarmark meistaranna var hins vegar glæsilegt en með því að jafna sýndu FH-ingar af hverju þeir eru meistarar því meistarar nýta jú færin.