Karlalið ÍBV í knattspyrnu tekur í dag á móti Fylki klukkan 18:00 á Hásteinsvelli. Bæði lið hafa farið frekar illa af stað, Fylkir er í neðsta sæti með ekkert stig og hefur ekki skorað mark en ÍBV er í 9. sæti með eitt stig og tvö mörk eftir fyrstu tvær umferðirnar. Leikurinn átti fyrst að fara fram í Árbænum en þar sem völlur Fylkismanna er ekki klár fyrir átökin í sumar, víxluðu liðin leikjum enda Hásteinsvöllur í góðu standi.

ÍBV gerði jafntefli gegn Fram í fyrsta leik en tapaði svo klaufalega gegn Stjörnunni á heimavelli þar sem leikmenn liðsins fóru afskaplega illa með fjölmörg dauðafæri. �?að er hins vegar ljóst að ef ÍBV spilar eins og það gerði í fyrri hálfleik gegn Stjörnunni, og nýtir auk þess færin, þá má eiga von á fyrsta sigrinum í dag. En eins og svo oft áður, vantar markaskorara í liðið og það verður að segjast eins og er að Jonathan Glenn, framherjinn frá Trínidad og Tóbakó, hefur fáa heillað í fyrstu tveimur leikjunum.