Útflutningsverðmæti sjávarafurða nam tæplega 25 milljörðum króna í ágúst samkvæmt fyrstu bráðabirgðatölum Hagstofunnar sem birtar voru í síðustu viku. Það er um 8% samdráttur í krónum talið miðað við ágúst í fyrra. Talsverð lækkun var á gengi krónunnar í ágúst eftir að hafa verið fremur stöðugt framan af ári og var gengi krónunnar að jafnaði um 5% lægra nú í ágúst en í sama mánuði í fyrra. Af þessum sökum er samdrátturinn í ágúst ívið meiri mældur í erlendri mynt, eða tæp 13%. Þetta kemur fram í Radarnum – fréttabréfi SFS.

Útflutningsverðmæti saltaðra og þurrkaðra afurða dróst svo saman um 58% á milli ára

Ofangreindan samdrátt má rekja til flestra vinnsluflokka, enda dróst útflutningsverðmæti allra flokka saman á milli ára í ágúst, að tveimur undanskildum. Ber fyrst að nefna fryst flök en útflutningsverðmæti þeirra nam 4,4 milljörðum króna í ágúst, sem er um fjórðungs samdráttur miðað við ágústmánuð í fyrra á föstu gengi. Eins var tæplega 28% samdráttur í útflutningsverðmæti fiskimjöls en verðmæti þeirra nam um 3,1 milljarði króna nú í ágúst. Útflutningsverðmæti saltaðra og þurrkaðra afurða dróst svo saman um 58% á milli ára. Verðmæti þeirra nam rétt um 760 milljónum króna í ágúst en það hefur ekki verið minna í einum mánuði eins langt aftur og mánaðartölur Hagstofunnar ná, sem er frá janúar árið 2002. Minni samdráttur var í öðrum þremur flokkum, þ.e. ferskum afurðum (-6%), heilfrystum (-9%) og öðrum sjávarafurðum (-9%). Á móti var ágúst nokkuð stór mánuður í útflutningi á lýsi. Þannig nam útflutningsverðmæti lýsis um 4,3 milljörðum króna í mánuðinum, sem er um 29% aukning á milli ára á föstu gengi. Eins var ágætis aukning í útflutningsverðmæti rækju (16%) en hún vigtar lítið í þessum tölum. Þessa sundurliðun á útflutningsverðmæti sjávarafurða í ágúst má sjá á myndinni hér fyrir neðan en ekki liggja fyrir upplýsingar niður á tegundir í þessum fyrstu bráðabirgðatölum Hagstofunnar.

Loðnan telur

Á fyrstu átta mánuðum ársins er útflutningsverðmæti sjávarafurða komið í rúma 222 milljarða króna. Það er tæplega 2% samdráttur miðað við sama tímabil í fyrra að teknu tilliti til gengisbreytinga. Þennan samdrátt má fyrst og fremst rekja til tveggja afurðaflokka, þ.e. heilfrysts fisks (-28%) og fiskimjöls (-20%). Í báðum þessum flokkum var loðnan fyrirferðarmikil í fyrra og áhrifin af loðnubresti því greinileg á útflutningstekjur í ár, eins og títt hefur verið fjallað um á Radarnum. Þannig er hægt að líta til þess að útflutningsverðmæti sjávarafurða á fyrstu sjö mánuðum ársins jukust um 1% frá sama tímabili í fyrra. Aftur á móti ef loðnan er tekin út fyrir sviga þá jókst útflutningsverðmæti um 9%. Afrakstur loðnuvertíðarinnar í fyrra er þó enn að skila sér í útflutningi í ár, eins og sjá má á myndinni hér fyrir neðan. Þar eru loðnuhrognin fyrirferðamest, enda var metframleiðsla á hrognum í vertíðinni í fyrra.

Af öðrum afurðaflokkum má nefna að samdráttur var í útflutningsverðmæti saltaðra og þurrkaðra afurða á milli ára sem nemur tæpum 3% á föstu gengi. Eins var samdráttur í útflutningsverðmæti rækju (-14%) og „annarra sjávarafurða“ (-2%) en þar undir teljast meðal annars loðnuhrogn . Útflutningsverðmæti annarra afurðarflokka jókst á milli ára. Þar munar mest um 40% aukningu í útflutningsverðmæti lýsis og 8% aukningu í útflutningsverðmæti ferskra afurða. Að endingu má nefna að lítilsháttar aukning var á útflutningsverðmæti frystra flaka sem nemur 1% á föstu gengi.