Á fundi bæjarstjórnar Vestmannaeyja í vikunni var athyglisverð umræða um meintan lýðræðishalla innan stjórnsýslu bæjarins á þessu kjörtímabili. Hildur Sólveig Sigurðardóttir, bæjarfulltrúi Sjálfstæðsflokksins hóf umræðuna undir liðnum “Kosning í ráð, nefndir og stjórnir” en þar var nýtt bæjarráð skipað og eru aðalmenn áfram Njáll Ragnarsson formaður, Jóna Sigríður Guðmundsdóttir varaformaður og Eyþór Harðarson.

Alvarlegt umhugsunarefni

Lauk Hildur máli sínu á að leggja fram bókun frá bæjarfulltrúum D lista. Þar segir:

„Á síðustu 5 árum hefur orðið raunveruleg skerðing á lýðræði við stjórnsýslu Vestmannaeyjabæjar. Merki þess sjást svart á hvítu ef borinn er saman fjöldi funda og fjöldi mála sem ráð sveitarfélagsins taka fyrir. Á árunum 2019 og 2024 var milli 22% og 34% fækkun mála sem eru að meðaltali tekin fyrir á hverjum fundi fræðslu-, fjölskyldu- og tómstunda-, umhverfis- og skipulags-, og framkvæmda- og hafnarráðs á sama tíma og fundum ráðanna hefur einnig farið fækkandi. Þannig hefur heildarfjöldi mála þessara ráða farið verulega fækkandi ef borin eru saman árin 2019 og 2024 eða úr um 450 málum í um 250 mál. Í ljósi vaxandi íbúafjölda, hás framkvæmdastigs og vaxandi krafa af hálfu ríkisins við stjórn og umsýslu sveitarfélagsins eru umsvif stjórnsýslunnar síst minni í dag en árið 2019.

Á sama tímabili hefur málafjöldi bæjarráðs farið vaxandi. Í bæjarráði sitja færri kjörnir fulltrúar en í almennum ráðum sveitarfélagsins og því ljóst að færri aðilar koma að ákvarðanatöku um stjórn sveitarfélagsins. Aukning málafjölda bæjarráðs skýrir þó ekki alfarið þá miklu fækkun sem orðið hefur á málafjölda annarra ráða og því umhugsunarefni hvað skýrir þessa breytingu og hvar fjöldi ákvarðana eru teknar.

Þessi staðreynd ætti að vera æðstu embættismönnum sveitarfélagsins og meirihluta bæjarstjórnar alvarlegt umhugsunarefni og viljum við hvetja meirihluta bæjarstjórnar til að spyrna föstum fótum við þessari varhugaverðu og andlýðræðislegu þróun og vinna gegn samþjöppun valds á fárra hendur.”

Ljóst var að þessi yfirferð Hildar olli titringi hjá meirihlutanum og óskaði bæjarstjóri fljótlega eftir fundarhléi og við því varð forseti bæjarstjórnar.

Starfsmönnum sveitarfélagsins verið falin fullnaðarafgreiðsla mála

Að loknu fundarhléi lögðu bæjarfulltrúar E og H lista fram eftirfarandi bókun:

„Meirihlutinn vísar því á bug að þær breytingar sem gerðar voru á samþykktum sveitarfélagsins árið 2020 hafi falið í sér skerðingu á lýðræði við stjórnsýslu Vestmannaeyjabæjar eins og minnihlutinn heldur fram í bókun sinni, enda samþykktu allir bæjarfulltrúar samhljóða þessar breytingar á sínum tíma. Með þeim breytingum hefur starfsmönnum sveitarfélagsins verið falin fullnaðarafgreiðsla mála sem heyra m.a. undir umhverfis- og skipulagsráð og fjölskyldu- og tómstundaráð.

Á tímabilinu voru til viðbótar innleidd farsældarlög sem drógu verulega úr málafjölda fjölskyldu- og tómstundaráðs. Svo viljum við benda minnihlutanum á það að það ráð sem er með sterkast umboð frá íbúum í Vestmannaeyjum er bæjarráð þar sem allir fulltrúar eru kjörnir bæjarfulltrúar.”

Skýrir ekki að fækkun heildarmálafjölda sé um 200 mál

Að endingu bókuðu bæjarfulltrúar D listans:

Þrátt fyrir þessar stjórnsýslubreytingar skýrir það ekki að fækkun heildarmálafjölda er um 200 mál, fundum allra ráða hefur fækkað og meðaltalsmálafjöldi allra ráða eru færri að undanskildu bæjarráði þar sem málum hefur fjölgað að meðaltali. Það er afar eðlilegt að kjörnir fulltrúar skoði þessar upplýsingar með gagnrýnum hætti og tryggi að ekki sé vegið að lýðræði eða eðlilegum stjórnsýsluháttum.

Fleira kom fram í umræðunum á fundinum. Horfa má á upptöku frá umræðunum um þetta mál hér að neðan. Umræðan hefst á 26 mínútu.