Fyrir nokkrum misserum safnaði www.eyjar.net spurningum saman sem að lesendur sendi inn á spjallborðið eða á tölvupóstinn eyjar@eyjar.net og voru ætlar Árna M. Matthisen. Fjármálaráðherra hefur nú sent okkur svör við þessum spurningum og birtum við þau hér að neðan.

Hefur ríkisstjórnin hug á að afnema tekjuskatt af raunávöxtun lífeyrissparnaðar til jafns við annan sparnað í landinu?
Skattlagning lífeyrissparnaðar er með allt öðrum hætti en aðrar tekjur og sparnaður. Þannig er enginn skattur lagður á þær tekjur sem aflað er og nýttar eru til lífeyrissparnaðar. Ávöxtun er einnig skattfrjáls allan tímann sem hún er inn í sjóðnum en síðan er stofninn og ávöxtunin skattlögð sem atvinnutekjur þegar greitt er út úr lífeyrissjóðnum. Alloft hefur sú aðferð sem notuð er í dag verið borin saman við hinn möguleikann, þ.e. að skattleggja tekjurnar í upphafi og skattleggja síðan ávöxtun með sama hætti og annan sparnað í landinu (10%) en niðurstaðan hefur ávallt verið sú að hagkvæmara sé fyrir einstaklingana að nota það kerfi sem viðhaft er í dag.  Af þeim sökum hefur ríkisstjórnin ekki lagt til að gera breytingar á skattlagningu lífeyrissparnaðar. 
                                                                                                                                                                                          
Hefur þú tölur um áætlaðan kostnað ríkissjóðs vegna hvers bæjarfélags fyrir sig sem og um tekjur þess sveitafélags á móti? 
Ef svo er hver er hlutfallslegur ávinningur ríkissjóðs af Eyjamönnum?
Slíkir útreikningar liggja ekki fyrir en ávinningur ríkissjóðs af Eyjamönnum er mikill og síst minni en af öðrum þegnum þessa lands. 
 
Er möguleiki á því að fella niður eða lækka niður fjármagtekjuskattin af sölu hlutabréfa í hitaveitu Suðurnesja?
Fjármagnstekjuskattur hér á landi er aðeins 10% af þeim hagnaði sem viðkomandi fær við sölu hlutabréfa, í þessu tilfelli vegna sölu á hlut í Hitaveitu Suðurnesja. Ég sé ekki forsendur fyrir því að fella hann niður í þessu tilfelli sérstaklega. 
 
Hvaða tillögur ríkisstjórnar Íslands vegna niðurskurðar á þorskkvóta á næsta fiskveiðiári eru merktar Vestmannaeyjum?
Rétt er að minna á að aðeins hluti þess fjármagns sem sett verður í mótvægisaðgerðir ríkisstjórnarinnar hefur nú þegar verið ráðstafað til verkefna eða svæða. Af þeim fjármunum er í Vestmannaeyjum gert ráð fyrir sérstöku fjármagni til Háskólaseturs vegna hafrannsókna, til uppbyggingar Nýsköpunarmiðstöðvar Íslands í Vestmannaeyjum og til Framhaldsskólans í Vestamanneyjum vegna aukningar námsframboðs. Þá verður sérstöku fjármagni veitt til aukningar flugferða milli lands og eyja yfir ferðamannatímann á næstu tveimur árum.  Þessu til viðbótar verða fjármunir settir í fisk- og hafrannsóknir, í viðhaldsframkvæmdir opinberra bygginga, í náms- og starfsþjálfun, til atvinnuþróunarfélaga og svo mætti áfram telja. Í þessa sjóði og fleiri munu eyjamenn geta sótt og hafa þar mikil tækifæri eins og aðrir staðir sem illa verða úti vegna niðurskurðar þorskaflans.

Tekin hefur verið ákvörðun um Bakkafjöru og samkvæmt áætlunum á hún að vera komin í gagnið 2010, hvaða samgöngubætur geta eyjamenn átt von á þangað til að Bakafjara kemst í gagnið?
Í stjórnarráðinu hefur verið lögð áhersla á að ganga frá samningi vegna flugsamgangna og er gert ráð fyrir að tryggja tvær flugferðir á dag, næstu fjögur árin. Þá var gert ráð fyrir í mótvægisaðgerðum ríkisstjórnarinnar að semja um þriðju flugferðina yfir sumarmánuðina, a.m.k. næstu tvö árin til þess að auka mögulegan straum ferðamanna til Vestamannaeyja. Aðrar ákvarðanir hafa ekki verið teknar. 
 
 
Hver er staðan á máli skipalyftunar sem hrundi, er málið fast í Brussel?
Málið er nú í meðferð ESA, eftirlitsstofnunar EFTA, sem þarf að svara því til hvernig og með hvaða hætti ríkið getur komið að endurbyggingu skipalyftunnar vegna þess tjóns sem þar varð á sínum tíma. Þetta er flókið mál vegna samkeppnissjónarmiða en vonandi fæst niðurstaða í það á næstu vikum. Við höfum gert breytingar, m.a. á lagaumhverfi og samgönguáætlun, með það að markmiði að auðvelda slíka aðkomu en ákvörðunin þarf samþykki ESA í Brussel. Ef við tökum ákvörðun um aðkomu ríkisins án slíks samþykkis gæti síðar þurft að krefja bæjarfélagið um endurgreiðslu ásamt viðlögðum álögum og kostnaði.  
 
Samgönguráðherra boðaði fyrr í sumar 20 aukaferðir Herjólfs en á næsta ári eiga þær ferðir að verða 15, er þetta ekki skerðing á samgöngum til Vestmannaeyja á næsta ári?
Það var samið um 15 ferðir til viðbótar þeim fimm ferðum sem áður hafði verið samið um. Samtals er því um að ræða 20 ferðir. Viðbótarsamingurinn, þ.e. 15 ferðirnar, var til ársins 2010 sem var lengra en áður hafði verið áætlað þannig að þetta er betri og meiri samgöngubót til lengri tíma litið.  
 
Sérðu á næstu 1-2 árum að fleiri opinber störf fari til eyja?
Eins og fram kemur í svari við spurningu fjögur er gert ráð fyrir fjármagni til háskólasetursins vegna hafrannsókna sem bæði getur nýst til stofnbúnaðar og launagreiðslna starfsmanna. Þar er því mögulegt að verði um aukningu að ræða. Þá er gert ráð fyrir tveimur störfum við Nýsköpunarmiðstöð Íslands í Vestamannaeyjum og aukið námsframboð framhaldsskólans ætti einnig að kalla á aukin opinber störf. Við erum stöðugt að vinna að ýmsum hugmyndum sem tengjast flutningi starfa út á land eða staðsetningu starfa án tilliti til staðsetningar. Að því verður unnið áfram á næstu mánuðum og vonandi leiðir það til frekari aukningar starfa í Vestmannaeyjum.
 

www.eyjar.net þakkar fjármálaráðherra kærlega fyrir þessi svör