Þegar ég viðra þessa skoðun mína segir mér eldra og fróðara(ok og yngra og fróðara) fólk að ef jólin væru oftar á ári yrðu þau ekki eins sérstök og þau eru. Þessu er ég bara ekki sammála, jól í desember og svo aftur í júní yrði geggjað, vetrarjól og sumarjól.

Jólin eru auðvitað ekkert nema hefðir á hefðir ofan og það getur truflað mig óþarflega mikið ef ákveðnir hlutir eru ekki eins og þeir eru vanir. Merkilegt samt að þetta snýr nær eingöngu að æskuheimili mínu, Heiðó, en þar hef ég haldið jólin alla mína ævi, að undanskildum tveimur skiptum. Það mæðir því mikið á foreldrum mínum að Fordekraða MiðjuBarnið fái allt eins og hún er vön…..
Ég var alveg að fara að ræða við þau um helgina að jólakortapokinn væri ekki komin á sinn stað, hamdi mig af því ég er ,,fullorðin” en ískraði af gleði þegar mamma kom með hann og slengdi honum á sinn stað…….. Ég, frek……aldrei.

Ég dáist að fólki sem er ekki fast í hefðum, fólk sem hefur mismunandi jólamat ár hvert, heldur jólin sín fjarri heimili sínu svo ég tali ekki um fólkið sem skiptir um jólaskraut á jólatrénu á hverju ári……skil þetta engan veginn en dáist að því. Það flippaðasta sem ég geri þetta árið er að skipta silfur jólatréstoppnum út fyrir bleikan glimmer topp,skil reyndar ekki að ég, andleg glimmer systir Páls Óskars,sé ekki löngu búin að því.

Elsku jólin koma ekki á morgun heldur hinn, koma í allri sinni dýrð hvort sem við erum búin að skúra, þrífa ofan af skápunum eða fægja silfrið(fægir fólk ennþá silfur?). Ég hlakka til að fá stóru stelpuna mína heim í kvöld, hlakka til að hitta litla bróður minn, hlakka til að eyða jólunum með Mána, litla hvolpinum okkar, í fyrsta sinn þó hann muni mjög líklega pissa á pakkana og éta allt sem fyrir honum verður. Ég hlakka til að borða lærið hans pabba, sósuna hennar mömmu sem er það góð að mig langar að drekka hana með röri og já ég hlakka til að opna pakkana. Ykkur að segja hlakka ég líka ósegjanlega til þegar Erla mín og co koma um áramótin, þá verða þau búin að vera í tveggja vikna sjálfskipaðri sóttkví svo við getum eytt áramótunum saman. Ég hlakka líka afar, afar mikið til að fá ástina mína til mín á milli jóla og ný-árs. Jólin eru nefnilega tími til að njóta samveru með þeim sem við elskum mest, gera það sem gleður okkur og finna hjartað okkar springa af hamingju við það að hugsa um hversu heppin við erum.

Hugur minn er hjá þeim sem þurftu að flýja náttúruhamfarir fyrir austan og vita ekki hvort eða hvenær þau komast heim. Hugur minn er hjá þeim sem eyða jólunum í sóttkví eða einangrun vegna, afsakið orðbragðið, fokking Covid. Hugur minn er hjá þeim sem búa við stríð, fátækt, ofbeldi, ótta eða sorg. Ég geri mér fullkomlega grein fyrir þeim forréttindum sem ég bý við og tek þeim ekki sem sjálfsögðum hlut.

Gleðileg jól elsku fólkið mitt, ég vona að jólin ykkar verði gleðirík, falleg, stútfull af samveru með fólkinu í ykkar jólakúlu, nóg af góðgæti og með dass af glimmeri og pallíettum.

,,Til lífs og til gleði”

Lóa