Stækkun á hafnarsvæði, Brimneskantur og viðlegukantur undir Kleifum var tekið fyrir á fundi umhverfis- og skipulagsráðs á mánudaginn sl.

Þar var lagt fram að lokinni auglýsingar á skipulagslýsingu vegna breytingar á aðalskipulagi Vestmannaeyja 2015-2035 vegna nýrra landnotkunareita fyrir hafnarsvæði Vestmannaeyjahafnar.

Alls bárust 39 umsagnir vegna málsins. 7 frá opinberum umsagnaraðilum, 10 frá fyrirtækjum og félögum og 22 frá íbúum.

Benda á að um sé að ræða óafturkræf neikvæð áhrif á nútímahraun sem nýtur verndar

Landsnet bendir á að verði að byggingu stórskipakants við Brimnes þurfi að huga að rekstri rafstrengja sem þar eru og munu koma. Færsla á háspennustrengjum sé dýr og flókin aðgerð og staðsetning stórskipahafnar svo nálægt landtöku strengjanna geti ógnað rekstraröryggi.

Náttúrufræðistofnun Íslands og Umhverfisstofnun benda á að um sé að ræða óafturkræf neikvæð áhrif á nútímahraun sem nýtur verndar og rask á svæði sem tilheyrir náttúruminjaskrá.

Áhyggjur af röskun við Löngu og áhrif á ásýnd innsiglingar og upplifun ferðamanna við komu til Eyja vegna iðnaðarsvæðis

Meðal viðfangsefna umsagna íbúa var ánægja með og ítrekun á mikilvægi framkvæmda við höfnina og ábendingar um útfærslu. Einnig komu fram áhyggjur af röskun við Löngu og áhrif á ásýnd innsiglingar og upplifun ferðamanna við komu til Vestmannaeyja vegna iðnaðarsvæðis við Brimneskant.

Á 303. fundi framkvæmda- og hafnarráðs er óskað eftir að við áframhaldandi gerð skipulagsáætlana sé aðalskipulagi við Löngu haldið óbreyttu fyrir utan styttingu Hörgaeyrargarðs.

Að unnin verði tillaga sem geri ráð fyrir stækkun hafnarsvæðis H-2 til austurs

Í afgreiðslu ráðsins segir að ráðið þakki bréfriturum og íbúum sem hafa látið sig málið varða. Ráðið tekur undir tillögu frá 303. fundi framkvæmda- og hafnarráðs um að halda núverandi aðalskipulagi við Löngu óbreyttu að undanskilinni styttingu Hörgaeyrargarðs.

Lagt er til að unnin verði tillaga á vinnslustigi að breyttu aðalskipulagi Vestmannaeyja 2015-2035 sem geri ráð fyrir stækkun hafnarsvæðis H-2 til austurs. Ráðið fól starfsfólki sviðsins framgang málsins.

Hér má lesa allar umsagnirnar sem bárust bæjaryfirvöldum vegna málsins.

https://eyjar.net/staekkun-hafnarinnar/

https://eyjar.net/haett-vid-hafnarkant-vid-longu/

https://eyjar.net/natturuperlur-eru-gridarlegt-verdmaeti/

https://eyjar.net/thurfum-ad-hugsa-ut-fyrir-boxid/