Bæjarráð Vestmannaeyja leggur til við bæjarstjórn að fasteignaskattur á íbúðarhúsnæði lækki á næsta ári úr 0,235% í 0,225%. Jafnframt verði hlutfallið óbreytt á opinberar stofnanir, 1,320%, en fasteignaskattur á annað húsnæði, þar á meðal atvinnuhúsnæði, lækki úr 1,325% í 1,315%.

Með þessari breytingu er stefnt að því að draga áfram úr áhrifum hækkunar fasteignamats á íbúa og fyrirtæki í Vestmannaeyjum, líkt og gert hefur verið undanfarin ár, segir m.a. í bókun ráðsins.

Á fundi bæjarráðs var jafnframt farið yfir vinnu sem staðið hefur yfir undanfarnar vikur á bæjarskrifstofum við að greina áhrif breytinga á álagningarprósentu fasteignaskatts á tekjur bæjarsjóðs. Bæjarstjóri kynnti þar helstu niðurstöður og þá tillögu sem nú liggur fyrir.

Kom fram að árlega sé gerð endurálagning fasteignaskatts í júní á alla flokka (A, B og C). Þá er afsláttur af fasteignagjöldum einstaklinga endurreiknaður miðað við skattframtal fyrra árs. Þetta er breytt verklag, þar sem nú er álagningin endurmetin hjá öllum eigendum fasteigna en áður aðeins hjá þeim sem þess óskuðu.