Íris Róbertsdóttir, bæjarstjóri og Katrín Ósk Þráinsdóttir, læsisfræðingur hjá Menntamálastofnun skrifuðu í morgun undir samstarfssamning um verkefnið Snemmbær stuðningur með áherslu á málþroska og læsi.

Snemmbær stuðningur er þróunarverkefni í leikskólum sveitarfélagsins til eins árs og fór undirskriftin fram í viðurvist starfsfólks leikskólanna. Við sama tækifæri afhenti Katrín Ósk leikskólunum veglegar bókagjafir með fjölbreyttu málörvunarefni fyrir hönd Menntamálastofnunar. Hlutverk Menntamálastofnunar er m.a. að veita sveitarfélaginu stuðning og ráðgjöf við að ná markmiðum sínum og þá er hlutverk Vestmannaeyjabæjar m.a. að tryggja að lykilstarfsmenn leikskóla fái svigrúm til að sinna verkefninu á meðan því stendur.

Að lokinni undirskrift tók við þétt fræðsludagskrá fyrir starfsfólk leikskólanna sem var helguð verkefninu. Var sú fræðsla í höndum Halldóru Guðlaugar Helgadóttur, verkefnastjóra verkefnisins og Ásthildar Bj. Snorradóttur, talmeinafræðings.

Umrætt verkefni var þróað af Ásthildi Bj. Snorradóttur þar sem lögð er áhersla á að auka þekkingu og hæfni alls starfsfólks leikskólanna með það fyrir augum að öll börn fái íhlutun og áskoranir við hæfi í leik og starfi þar sem málþroskinn er kjarninn. Inngrip verður markvissara og starfsfólkið styrkist í starfi.